د ریاست الوزراء سیاسي مرستیال مولوي عبدالکبیر د افغانستان لپاره د بریټانیا سفارت له شارژدافیر رابېرټ ډېکسن سره په کابل کې کتلي او پر دوه اړخيزو مسايلو يې بحث کړی.
ډېکسن ډاډ ورکړی چې هېواد يې د يوه باثباته افغانستان پلوی دی او په هېڅ صورت اجازه نه ورکوي چې په بریټانيا کې د اسلامي امارت مخالف سياسي جهتونه فعاليت وکړي.
ډېکسن دغه راز پر افغانستان د اقليمي بدلون ناوړه پايلو اغېز ته په پام ډاډ ورکړی چې لندن به له کابل سره د يادو اغېزو په کمولو کې همکاري جاري وساتي.
د اسلامي امارت مرستیال ویاند حمدالله فطرت وايي: «رابېرټ ډېکسن د بریټانیا او اسلامي امارت ترمنځ ناستې د دواړو لورو پر ګټه وبللې او ټینګار یې وکړ چې بريټانیا په خپل هېواد کې د اسلامي امارت مخالفینو ته د فعالیت اجازه نه ورکوي. نوموړي زیاته کړه چې انګلستان یو باثباته افغانستان غواړي او د بشري مرستو او اقلیمي بدلون په برخو کې خپلو همکاریو ته ادامه ورکوي.»
ډېکسن د کابل او لندن ترمنځ د يو لړ مهمو مسايلو په تړاو په راتلونکي کې د دوه اړخېزو ناستو د جوړېدو وړانديز کړی او په خبره يې بریټانيا هڅه کوي د کابل او نړيوالو ترمنځ د اړيکو په رغولو کې د يوه درېيمګړي هېواد په توګه رول ولوبوي.
په ورته وخت کې د ریاست الوزراء سیاسي مرستیال په دې لیدنه کې ویلي په هېواد کې د بشري حقونو تأمين ته بشپړه پاملرنه شوې او په دې برخه کې له نړيوالو سره کړې ژمنې عملي شوې دي.
فطرت په دې اړه وايي:« محترم مولوي عبدالکبیر د بریټانیا له شارژدافیر سره د اړیکو د ساتنې لپاره د هغه هڅې وستایلې او څرګنده یې کړه چې اسلامي امارت د بشري حقونو ساتنې ته ژمن دی. نوموړي زیاته کړه چې په افغانستان کې د نشه يي توکو کښت او کاروبار صفر ته ټیټ شوی او د روږدوکسانو درملنه په اغېزمنه توګه روانه ده.»
د سیاسي چارو کارپوهان دغه ليدنه اغېزناکه بولي او ټینګار کوي چې بریټانیا کولی شي د لوېدیځې نړۍ او اسلامي امارت ترمنځ د اړیکو پیاوړتیا لپاره ښه منځګړیتوب وکړي.
د سیاسي چارو کارپوه توریالی ځاځی وايي: « نو پر دې اساس باندې باید خپله اسلامي امارت هم خپلې هڅې وکړي ترڅو له نړیوالو هېوادونو سره خپلې ډیپلوماټیکې اړیکې کلکې وساتي، ترڅو دا هېواد او دا نظام د دغو ستونزو سره چې تر نن ورځې پورې مخامخ ده، وژغورل شي او نړیوال وکولی شي چې افغانستان پر رسمیت وپېژني.»
د سیاسي چارو کارپوه محمد سلیم پیګیر وايي: « انګلیس او د نړۍ نور هېوادونه هم اجازه ورنه کړي چې وسله والې ډلې د افغانستان خاورې ته دننه کړي او له هغو څخه د افغانستان او ګاونډیو هېوادونو پر وړاندې ګټه واخلي.»
کابل ته د افغانستان لپاره د بریټانيا سفارت شارژدافیر سفر داسې مهال دی چې تازه ایټاليا هم صبرينا اوګوليني د افغانستان لپاره خپله شارژدافیره ټاکلې او د قطر په پلازمېنې دوحې کې به د افغانستان لپاره د ایټاليا سفارت چارې سمبالوي.
