په داسې حال کې چې هرات ولایت کې پر نشه يي توکو یو شمېر روږدي کسان له خپلو کورنیو ورک دي او د کورنۍ غړي یې د لټون هڅه کوي، دغه کسان پر نشه يي توکو د روږدو کسانو لپاره د درملنې ځانګړي ۴زره بستريز روغتون کې ساتل کېږي.
د دوی په منځ کې يو تن د جوزجان ولایت اوسېدونکی۷۶ کلن عبدالله دی.
هغه پوره ۴۵ کاله نشه يي توکي کارولي او ۲۲ کاله کېږي چې له خپلې کورنۍ ورک شوی او خپلوان يې له مړي او ژوندي خبر نه لري.
عبدالله له څه باندې دوو کالو راهيسې په هرات کې پر نشه يي توکو د روږدو کسانو د درملنې په روغتون کې دی، خو اوس یې روغتیايي حالت ښه دی او د خپلې کورنۍ په تمه ناست چې له روغتون يې کور ته یوسي.
عبدالله وايي: « زه هرات ولایت ته مسافر شوم او نږدې ۲۲ کاله کېږي چې همدلته هرات کې یم. یوځل ایران ته لاړم خو بېرته یې راوړم او دلته مې کوڅو او واټونو کې ژوند تېراوه. دوه کاله او یوه میاشت کېږي چې په دې روغتون کې بستر یم.»
له خپلو کورنیو یو شمېر نور ورک شوي کسان هم وایي، د نشه يي توکو کارول له دې کبله ورته ګران پرېوتي چې له کلونو راهيسې یې د خپلې کورنۍ غړي نه دي ليدلي.
دوی زياتوي، د خپلو کورنيو د موندلو لپاره به تر نامالوم راتلونکي د روږدو کسانو د درملنې په روغتون کې انتظار وي.
له نشه يي توکو روغ شوی فضل احمد وايي: « له ایران رد مرز شوم او د وزګارتیا له امله مې نشه يي توکو ته مخه کړه. دلته د هرات ښار په پارکونو او زیارتونو کې مې شپې تېرولې. حکومت ونیولم او دلته یې راوستم. هېڅوک زما له ژوند خبر نه لري، ځکه کورنۍ مې ایران کې اوسېږي.»
د روږدو کسانو د درملنې په روغتون کې ساتل کېدونکی عبدالعزیز بیا وايي: « ما ډېر غمونه او ډېرې سختۍ وګاللې. کورنۍ، ټولنې او خپلوان رانه لرې شول او زه یوازې دلته روغتون کې اوسېږم.»
له دې سره، د هرات ځايي مسوولین وایي، د روږدو کسانو د درملنې په روغتون کې نږدې د ټولو ولايتونو داسې کسان شته چې د نشه يي توکو له کارولو رغېدلي دي.
دوی له هغو کورنیو غواړي چې د هرات ۴ زره بستریز روغتون ته مراجعه وکړي چې پر نشه يي توکو روږدي کسان یې ورک شوي دي.
هرات کې د نشه يي توکو پر وړاندي د مبارزې مدیر حیاتالله روحاني وايي: « له موږ سره دلته د ۳۴ ولایتونو کسان شته دي. دغو کسانو راته ویلي چې له ۱۵ تر ۲۰ کالو یې دلته تېر کړي. د کورنۍ له غړیو هېڅ خبر او آدرس نه لري.»
موده وړاندې د يادو رغېدلو کسانو په څېر يو شمېر نور کسان هم په هرات کې خپلو هغو کورنيو ته وسپارل شول چې له کلونو راهيسې ورک او کورنۍ یې ترې نا خبره وې.
