پاکستان له اوږدې مودې راهیسې د افغانستان له هر حکومت سره د خصمانه سیاست پاللو ترڅنګ هڅه کړې چې په سوداګریزه برخه کې هم اړیکې کرکیچنې او یوازې د خپلې خوا ګټې په پام کې ونیسي.
کابو دوه میاشتې کیږي چې پاکستان د افغان سوداګریزو توکو پرمخ د تورخم لار تړلې چې له امله یې افغان سوداګرو او د لویو بار وړونکو موټرو خاوندانو ته مالي زیانونه اوښتي.
افغان سوداګر د تورخم دروازې له تړل کېدو اندېښمن دي او وایي، د دې ټرانزیټي لارې په تړل کېدو سره دوی ته میلیونونه ډالره زیان اوښتی.
دوی له سرپرست حکومت د لارې خلاصېدل یا د بدیلو لار لټول غواړي.
پانګوال او اقتصادي کارپوه صادق حمیدزوی وايي: « که څه هم د تورخم دروازې له تړل کېدو سره زموږ سوداګر او بزګران له ډېرو مالي زیانونو سره مخامخ شوي او پاکستان دغه کار یو غیر منصفانه عمل دی، خو افغان سوداګر باید تل یوه بدیل لاره هم ولري. موږ باید د خپلو سبزیجاتو او تازه مېوو لپاره سړې خونې ولرو، ترڅو د لارو بندېدو پرمهال یې وساتلی شو. افغان پانګوال باید په دې اړه فکر وکړي ترڅو په راتلونکي کې له دې ډول ستونزو او زیانونو ځانونه وژغوري.»
همدارنګه، د سوداګرۍ خونې مسوولین هم ورته خبره کوي او وایي، روان کال له پاکستان سره د ټرانزیټ په برخه کې ۶۰ سلنه کموالی راغلی چې ورسره افغان سوداګر له ګڼو ستونزو سره مخ دي.
د افغانستان او پاکستان د ګډې سوداګرۍ خونې مشر خانجان الکوزی وايي: « دا ټول خدمات وو، د کال دوه میلیارد ډالره موږ دوی ته خدمات، انتقالات او ټرانسپورټ ورکول، خو اوس ټول له منځه لاړل. دا هم د پاکستان او هم د افغانستان د اقتصاد لپاره لوی زیان دی. په دې وروستیو کې د پاکستان د خبرو اترو دروازې تړلې دي او په دې سره زموږ تجارت تر ۶۰ سلنو پورې راکم شوی دی.»
الکوزي په خبره، پاکستان تل هڅه کړې له افغانستان سره په سوداګریزه برخه ستونزې جوړې او وخت ناوخت په بېلا بېلو بهانو دغه هېواد ته د افغاني صادراتو مخه ونیسي.
هغه په دې اړه وايي:« پاکستاني لوری هرکله بهانې جوړوي. دوی نه یوازې تجارتي لارې تړي بلکې د تجارت پر وړاندې ادارې ستونزې هم را پیدا کوي. داسې ستونزې چې له ډبلیو.ټي.او او نړیوالو سوداګریزو قوانینو سره ټکر لري.»
سوداګر غوښتنه کوي چې افغانستان باید د پاکستان له لارې نورو هېوادونو ته د خپلو صادارتو لېږد لپاره بدیلې لارې پیدا کړي او په خبره یې تر ټولو غوره لاره هوایي دهلېزونه دي.
