د لرې پرتو او غرنیو سيمو خلک د مخابراتي خدمتونو له کیفیت او دغه راز کمیت څخه شکایتونه کوي، حال دا چې په دغو سیمو کې انټرنېټي خدمتونه په نشت حساب دي.
تازه د افغانستان مخابراتي خدمتونو د تنظیم ادارې (اترا) له ځېنو مخابراتي شرکتونو سره د څه باندې ۱۳ ميليونه ډالرو په ارزښت تړونونه لاسلیک کړل چې له مخې، به یې په ۱۵ ولایتونو کې ۱۴۹ نوي مخابراتي سایټونه فعال شي.
د مخابراتو او مالوماتي ټکالوژۍ وزارت چارواکي که څه هم په لرې پرتو سیمو کې د انټرنېټ د ټيټ کيفيت ستونزه مني، خو وايي ژر به دغه ستونزه هم حل شي.
د مخابراتي او مالوماتي ټکنالوژۍ وزارت سرپرست نجیب الله حقاني وايي: « نن د لاسلیک کېدونکي قرارداد مالي ارزښت ۱۳.۸ میلیونه ډالره دی. د دې پروژو په پلي کېدو سره به وکولی شو چې د افغانستان لرې پرتې سیمې تر مخابراتي پوښښ لاندې راولو.»
حقاني پر مخابراتي شرکتونو د ښه کیفیت خدمتونو وړاندې کولو غږ کوي او وايي، د بهرنیو کادرونو په کارولو سره دې افغانان په تخنيکي برخو کې وروزي او بیا دې یې په دندو وګوماري.
هغه زیاتوي: «کله چې دلته کوم بهرني وګړي ته د کار کولو اجازه ورکول کېږي، نو شرط به یې دا وي چې د افغانانو په روزنه کې به مرسته کوي.»
د مخابراتو او مالوماتي ټکنالوژۍ وزارت او اترا ادارې د مالوماتو له مخې، د ټولیز لاسرسي لسمې پروژې په اډانه کې د څه باندې ۳۲.۸ میلیونه ډالرو په ارزښت قراردادونه لاسلیک شوي او ډېر ژر به یې د تطبيق چارې پیل او ګټه اخیستنې ته به وسپارل شي.
