د اومر ماین پاکۍ موسسې د ۲۰۲۴ کال د جون میاشتې له ۱۳ مې نېټې په بغلان او کندوز ولایتونو کې د ماین پاکولو پروژه پیل او د سپټمبر پر ۲۴مه یې پای ته ورسوله.
ځايي اوسېدونکو ته د ناچاوده توکو او ماینونو څخه د پاکو شویو سیمو د سپارلو مراسمو کې د یادې موسسې مسوولینو ویلي، په دې موده کې یې په ۲۸ ساحو کې۳۶۳ زره او ۴۱۴ متر مربع ساحه له خطرناکو توکو پاکه کړې او ۹۴ حلقې بېلابېل د پرسونل ضد ماینونه او ۱ زر او ۲۳ نور ډول ډول چاودېدونکي توکي یې شنډ کړي دي.
په بغلان او کندوز کې د اومر ماین پاکۍ موسسې مسوول حاجي اول خان وايي: « د اومر ماین پاکۍ موسسې په شمال ختیځ زون کې د څلورو میاشتو کار پرمهال د کندوز او بغلان پنځه ولسوالۍ، چهاردره، خان آباد، پلخمري، دهن غوري او برقع کې ۳۶۳ زره ۴۱۴ متر مربع ساحې په بشپړه توګه له ماینونو پاکې کړې.»
ځايي خلک د اومر ماین پاکۍ موسسې له فعالیتونو خوښ دي او له نړیوالو غواړي چې افغانستان کې د ماین خطر له منځه وړلو لپاره دې د ماین پاکوونکو موسسو ملاتړ وکړي.
د ماین چاودنه کې معلول شوی عطالله وايي: « زه ماین ووهلم، پښې مې پرې شوې او ټول ځان مې ژوبل ژوبل دی. زه ډېر خوښ یم چې زموږ له ساحې ماینونه پاک شول او نور خلک زما په برخلیک نه اخته کېږي. دا د خدای رحم دی چې ماین پاکوونکي دلته راغلي دي.»
له ماینونو او ناچاودو توکو پاکو شویو سیمو او نورو بېلابېلو پروژو د کاري کیفیت د څارنې په موخه د یوناما مرستیال په لرې پرتو سیمو کې د اومرماین پاکۍ موسسې فعالیتونه ستايي او په راتلونکې کې د ملاتړ ډاډ ورکوي.
د ملګرو ملتونو د سرمنشي استازې مرستیال انډریکا راټواټ وايي: « زه ډېر خوښ یم، چې نن دلته په جنت باغ سیمه کې د اومر ماین پاکۍ موسسې د هغو کارونو شاهد یم چې د ملګرو ملتونو د ماین پاکولو ادارې له لوري تمویلېږي. د ماینونو او ناچاوده توکو پاکول او تر ټولو مهمه د ناچاوده توکو له شتون پاک افغانستان د ملګرو ملتونو لپاره یو اصلي لومړیتوب دی. هغه هڅې چې د اومر ماین پاکۍ موسسې د خلکو او په ځانګړي ډول د ماشومانو د ژوند د ژغورلو په برخه کې ترسره کوي؛ د قدر وړ دي. موږ پوهېږو چې د دې پروژې د پیل راهیسې په تېرو څلورو میاشتو کې ۲۲ مختلف النوع ناچاوده توکي موندل شوي. له همدې کبله د اومر ماین پاکۍ موسسې د ماین موندنې او له منځه وړلو په برخه روانې هڅې ډېرې اړینې دي؛ ځکه دغه سیمه په تېرو کلونو کې د پراخو جګړو کوربه وه. د دې ترڅنګ، موږ دلته د ماین د خبرتیا او عامه پوهاوي په برخه کې د دوی هغه هڅې هم ستایو چې د ماشومانو لپاره یې ترتیب کړې دي.»
د شمالي ولایتونو د ماین پاکۍ عمومي مسوول هم د اومر موسسې هڅې ستایي، خو په خبره یې اوسمهال له مالي ستونزو سره مخ دي او له مالي ملاتړ وروسته به پاتې سیمې سروې او له خطر څخه پاکې کړي.
نوموړی له مالي ملاتړ کوونکو غواړي، په بشپړه توګه د ټول هېواد پر کچه د ماینونو او ناچاودو توکو د خطرله منځه وړلو په موخه د اومر په څېر ماین پاکۍ موسسو مالي ملاتړ وکړي.
د شمال ختيځو ولایتونو لپاره د ماین پاکۍ عمومي مسوول خواجه زبېر صدیقي وايي: « دا مهال یوڅه له مالي ستونزو سره مخ یو او نه شو کولی په هغې چټکۍ سره کار وکړو چې دلته ورته اړتیا ده. تاسو پوهېږئ افغانستان نه شي کولی په خپل مالي لګښت دغه کار ترسره کړي او نړیوال هم په هغه کچه مرستې نه کوي چې اړتیا ده. زموږ هڅې روانې دي او ډاډ درکوم چې پاتې ساحې به هم پاکې کړو.»
دا په داسې حال کې ده چې اومر ماین پاکۍ موسسې له پیل تر دې دمه په ۳۴ ولایتونو او ۲۵۳ ولسوالیو کې۷۳ زره ۹۵۵ کړۍ ماینونه او ۱.۴ میلیونه بېلابېل ډوله مهمات له منځه وړي او د کرنیزو ځمکو، سړکونو، دولتي ودانیو او سفارتونو په ګډون یې ۳۰۳.۵ کیلومټره مربع ساحه له خطرونو څخه پاکه کړې ده.
