د سمنګان ولایت خلم ولسوالۍ په تاشقرغان سیمه کې د انځرو د پېر او پلور لوی بازار ودان دی، چې د بل هر وخت پرتله په کې دا مهال زياته ګڼه ګوڼه لیدل کېږي.
که څه هم تېر ته په کتو سږ کال دلته د انځرو حاصلات ۲۰ سلنه زیات شوي، خو د یادې مېوې کاروباریان او بڼوال وايي، د طبیعي آفتونو د مخنیوي لپاره د سرپرست حکومت ملاتړ ته اړتیا لري.
د دوی په خبره، د حاصلاتو له زياتوالي سربېره، طبيعي آفتونو او نباتي ناروغیو د انځرو حاصلات او ونې زيانمنې کړې دي.
انځېر پلورونکی نظام الدین وايي: « د انځرو حاصلات د تېر کال پرتله ښه شوي او خریداران یې هم ډېر شوي دي.»
د انځرو یو بل کاروباري قدرت الله بیا وايي: « ډېری د شمالي ولایتونو بلخ، جوزجان او کندوز خلک راځي او انځر اخلي. یوه کیلو انځر له ۲۰۰ تر ۲۵۰ افغانیو پلورو.»
د تاشقرغان دغه بازار هر کال د انځرو د پېراو پلور پرمهال ګرم وي او له دې لارې تېرېدونکي مسافر ترې انځر پېري.
د بلخ او جوزجان اوسېدونکي چې یاد بازار ته په سیل او سیاحت ورغلي وایي، هر کال د انځرو په موسم کې دغه بازار ته راځي او تازه انځر اخلي.
د بلخ اوسېدونکی محیالدین وايي: « انځر یوه ګټوره مېوه ده، غواړم ډېر واخلم خو بیه یې څه ناڅه لوړه ده. له پلورونکو غوښتنه کوم چې قیمتونه راټیټ کړي.»
همدارنګه د جوزجان اوسېدونکی یعقوب وايي: « زه له جوزجان ولایت څخه انځر خوړولو ته راغلی یم؛ هم له انځرو او هم له باغونو خوند اخلم.»
ورته مهال، د سمنګانو ځايي چارواکي مني چې د انځرو ونې طبیعي آفتونو ځپلې دي، خو وايي سږکال د یادې مېوې په حاصلاتو کې ۲۰ سلنه زیاتوالی هم راغلی.
دوی زیاتوي، په دې ولایت کې پر ۳۲۰ هکټاره ځمکه د انځرو باغونه جوړ شوي چې د اټکل له مخې به تر پنځه مټریک ټنو پورې حاصلات ولري.
د سمنګان د کرنې ریاست د ترویج آمر عبدالخلیل کریمي وايي: « انځر د سمنګانو یوه له ارزښت لرونکو او مشهورو مېوو څخه ده او په ویاړ یې یوه ولسوالي هم نومول شوې ده. خو له بده مرغه هر کال د اقلیمي بدلونونو له امله د دغې مېوې حاصلاتو ته زیان رسېږي. تېر کال د دې مېوې حاصل نږدې صفر و خو سږ کال څه ناڅه ښه دی.»
د سمنګان په بازارونو کې یو کیلو انځر له ۱۸۰ افغانیو تر ۳۰۰ افغانیو پورې پلورل کېږي.
ډاکټران وايي، انځر په خپل ترکيب کې د مګنیزیم، پوتاشیم، کلسیم او فاسفورس په لرلو سره د سر، غاښونو، ستوني او معدې دردونو او تنفسي ناروغیو د مخنیوي لپاره ګټور دي.
