د افغانستان سولې لپاره د امریکا پخوانی ځانګړی استازی زلمی خلیلزاد پر خپله اېکس پاڼه یوه بیان کې ویلي، د دوحې په هوکړهلیک کې چې د پخواني ولسمشر ډونالډ ټرمپ په اداره کې له اوسني سرپرست حکومت سره لاسلیک شوی، د اسلامي امارت لهخوا د بشري حقونو رعایت موضوع نه ده یاده شوې.
خلیلزاد دغه څرګندونې د استازو جرګې د بهرنیو اړیکې کمېټې د مشر مایکل مککال د پرېکړهلیک په ځواب کې کړي.
د هغه پرېکړهلیک په یوه برخه کې راغلي چې ګواکې خلیلزاد ادعا کړې چې اسلامي امارت به خپلو ژمنو او بشري حقونو ته درناوی وکړي.
خلیلزاد زیاته کړې، هیڅکله یې داسې یوه ادعا نه ده کړې او په وینا یې په دې اړه د مککال څرګندونې له حقیقته لرې دي.
خلیلزاد ویلي، د دوحې هوکړه د ده په همکارۍ د ۲۰۲۰م کال په فبرورۍ کې لاسلیک شوه چې یوازې له افغانستانه د امریکایي ځواکونو د وتلو شرایطو، پر هغو د نه حملو او له افغانستانه د ترهګریزو ډلو د ګواښونو مخنیوي ته په کې اشاره شوې ده.
د خلیلزاد په خبره، اسلامي امارت هغه مهال هوکړه کړې وه چې د یوه نوي حکومت د جوړېدو او د هغه حکومت د بشري حقونو پر تګلارو به د دوی، پخواني جمهوري حکومت او نورو افغانانو ترمنځ جلا خبرې کېږي.
دا په داسې حال کې ده چې د استازو جرګې د بهرنیو اړیکو کمېټې مشر مایکل مککال یوځل بیا د جوبایډن اداره تورنه کړې چې ګواکې له افغانستانه د امریکایي ځواکونو د وتلو پر مهال د ګډوډۍ عامل وه.
