د بلخ ولایت د حوزوي روغتون مسوولین وايي، د روان کال له پیله تر دې مهاله د زړه پر ناروغۍ سلګونه کسانو ورته د درملنې په موخه مراجعه کړې، چې د تېر پرتله يې شمېر زيات شوی.
دوی د یادې ناروغۍ زیاتوالي له امله د اندېښنې ترڅنګ له خلکو غواړي، چې د زړه ناروغۍ مخنيوي لپاره روغتيايي لارښوونې په پام کې ونيسي.
د بلخ حوزوي روغتون داخله څانګې مسوول ډاکټر عبدالوحید یوسفي وايي: « په ۱۴۰۲ لمریز کال له موږ سره ۲ زره ۵۵۸ د زړه ناروغان بستر وو خو د روان کال له پیل راهیسې ۴۷۳ ناروغان راجسټر شوي او یو شمېر یې لاهم په بستر کې دي.»
ډاکټران په ورځني ډول سپورټ کول، د وزن کمول او د وینې پاکوالی د زړه ناروغیو په مخنیوي کې ډېر مهم بولي او له ښاریانو د دغو ټکو د عملي کولو غوښتنه کوي.
ډاکټر یوسفي زیاتوي: « هغه عوامل چې د زړه د ناروغیو سبب کېږي عبارت له چاغي، د سیګرېټو څکول، د وینې غوړ یا چربي لرل، د شکرې ناروغي لرل، د فعالیت نه لرل او دغه راز د کورنۍ په غړیو کې د دې ناروغۍ شتون هم د وینې د لوړ فشار او زړه ناروغیو سبب کېږي.»
په ورته مهال، روغتون کې یو شمېر بستر ناروغان د داکټرانو له کړنو او چلن خوښ دي، خو د دغې ناروغۍ په مخنیوي کې خلکو ته د طبي لارښوونو او عامه پوهاي غوښتنه کوي.
د زړه پر ناروغۍ اخته خال مراد وايي: «ډاکټران ډېره ښه رسېدنه کوي او شپه ورځ زموږ په خدمت کې دي. په هره خونه کې نوکریوال لري او په ټاکلي وخت درمل راکوي.»
د زړه پر ناروغۍ اخته بل ناروغ عبدالحکیم وايي: «زه له ډاکټرانو خوښ یم، اوس مې ناروغي ښه شوې او ساه ایستلی شم. کومه ورځ چې دلته راغلم، په ډېر تکلیف مې ساه ایستله.»
د زړه ناروغي هغه وژونکې ناروغي ده، که پر وخت یې درملنه ونه شي او یاهم طبي لارښوونې په پام کې ونه نیول شي، د انسان د مړینې لامل کېدای شي.
په همدې اساس، هر کال د یادې ناروغۍ د مخنیوي لپاره د عامه پوهاوي په پلمه د زړه ناروغیو نړیواله ورځ نمانځل کېږي.
