د سرپرست حکومت له واکمنۍ که څه هم څه باندې درې کاله تېرېږي، خو له رسميت پېژندنې پرته د سيمې او نړۍ په ځينو هېوادونو کې د افغانستان سفارتونه او سياسي استازولۍ ياد حکومت ته سپارل شوي.
د بهرنيو چارو وزارت ويلي، د عمان په پلازمېنه کې د افغانستان سفارت د اوسني حکومت ډيپلوماټانو پر مټ بېرته فعال شوی او دغلته به په نورما ډول خپل فعاليت پر مخ وړي.
د دغه وزارت مرستیال ویاند حافظ ضیا احمد تکل وايي، په مسقط کې د افغانستان سفارت له کوربه هېواد سره په تفاهم فعال شوی او د تېرې يکشنبې په ورځ يې رسما فعالیتونه پيل کړې.
هغه په دې اړه وايي:«د عمان پلازمېنې مسقط کې د افغانستان د سفارت چارې د اسلامي امارت ډیپلوماټانو له لارې په منظم ډول ترسره کېږي. دغه سفارت خپل فعالیتونه د ۱۴۴۶ کال د درېیمې میاشتې له پنځمې نېټې راهیسې په عادي ډول پیل کړې دي.»
تکل وايي، په مسطقط کې د افغانستان سفارت په فعالېدو سره به په راتلونکي کې د کابل او مسقط دوه اړخېزې اړيکې لا پسې وغوړېږي.
هغه زیاته کړې: « د کوربه هېواد په همکارۍ د سفارت د فعالیتونو بیا پيل به د کابل او مسقط ترمنځ د سیاسي، اقتصادي او دینې اړیکو په پیاوړتیا کې رغنده رول ولوبوي.»
د نظر خاوندان د عمان په پلازمینه مسقط کې د افغانستان سفارت چارو پیلیدل ګټور ګڼي او زیاتوي، چې له دې سره به افغانستان پر نړيواله کچه له هېوادونو سره تعامل ته يو قدم نور هم ور وړاندې شي.
د سیاسي چارو کارپوه حکمتالله حکمت وايي: « له عمان سره ډیپلوماټیکې اړیکې په حقیقت کې د دې ثبوت دی چې موږ په نړۍ کې د تجرید له حالت څخه د تعامل حالت ته روان یو. هیله ده چې په کورنیو چارو کې د اصلاحاتو له لارې دغه پروسه نوره هم ګړندۍ کړو، ترڅو افغانستان خپل نړیوال موقف او حق ترلاسه کړي.»
د سیاسي چارو کارپوه خلیل احمد نادم بیا وايي: « دولتونه له یو بل سره اړیکې لري. له بل دولت سره د هر ډول اړیکو جوړېدل د افغانستان پر ګټه دي. دا هېوادونه کولی شي په افغانستان کې پانګونه وکړي، افغانستان ته سفر ولري او افغانان هلته مېشت دي او دا له هره پلوه د افغانستان پر ګټه ده.»
په عمان کې د افغانستان سفارت له بيا فعالېدو يوه اوونۍ وړاندې برعکس په ناروې کې د افغانستان سفارت وتړل شو او ټاکل شوې ده، د روانې سپټمبر پر ۲۷مه په لندن کې هم د افغانستان سفارت خپل فعاليت تر نامالومې مودې وځنډوي.
