د امريکا په نيويارک ښار کې د نړیوالې سوداګرۍ پر غبرګو برجونو او د دفاع وزارت پر ودانۍ (پنټاګون) د القاعده شبکې د هغه برېد له ۲۳مې کليزې سره برابره ده چې په پایله کې يې نږدې ۳ زره کسان ووژل شول.
د القاعده شبکې غړیو دغه برېدونه د هغو مسافر وړونکو الوتکو په وسيله وکړل چې د امریکا له هوايي ډګرونو تښتول شوې وې.
هغه مهال ادعا وه چې د يادې شبکې مشر اسامه بن لادن په افغانستان کې پټ دی او له همدې ځای يې پر امريکا د سپټمبر ۱۱مې بريدونه پلان کړی دي.
له دې بريدونو شاوخوا يوه مياشت وروسته، د ملګرو ملتونو د پرېکړې پر بنسټ د امريکا پر مشرۍ نړيوال اېتلاف پر افغانستان د ځمکې او هوا له لارې برېد پيل کړ او ویې ویل چې دا برېد په افغانستان کې د القاعده شبکې له منځه وړلو او ترهګرۍ سره د مبارزې لپاره شوی.
د امریکا پخواني ولسمشر جورج ډبیلو بوش د خبرو یوه برخه: « زموږ له وسله والو ځواکونو، زموږ له متحدینو او له افغان جنګیالیو مننه، د طالبانو رژیم پای ته سېږي.»
که څه هم امریکایي لوري له بريد وړاندې د اسلامي امارت له هغه مهال حکومت غوښتنه کړې وه چې د سپټمبر ۱۱مې پیښې عامل چې اشاره يې اسامه بن لادن ته وه ور وسپاري، خو د وخت حکومت یې غوښتنه رد کړه.
ورپسې د ا مريکا پر مشرۍ نړيوالو اېتلافي ځواکونو په افغانستان کې د القاعده خلاف بريدونه پيل او په کابل، کندهار او ننګرهار کې یې یو شمېر اهداف په نښه کړل.
د چارو څارونکي وایي، امریکا هم د پخواني شوروي اتحاد په څېر پر افغانستان د برید تېروتنه وکړه.
دوی زیاتوي، امریکا او شوري اتحاد د خپلو سیاسي ګټو په موخه پر افغانستان یرغلونه وکړل او زرګونه بې ګناه افغانانو ته یې مرګ ژوبله واړوله.
د پوځي چارو کار پوه توریالی ځاځی وايي: « افغانستان د دوو زبرځواکونو امریکا او روسیې د رقابتونو قرباني شو. د سپټمبر ۱۱ مه د نړۍ په سیاست کې ډېر لوی بدلون و. پر افغانستان د امریکایانو یرغل او بېرته وتل د دوی لپاره تاریخي ماتې او شرم و.»
پر افغانستان د امریکايي ایتلاف له بريد یوه لسیزه وروسته، امریکايي ځواکونو د ولسمشر بارک اوباما د ولسمشرۍ پرمهال د القاعدې شبکې مشر اسامه بن لادن د پاکستان پلازمېنې اسلام آباد ته څېرمه په ایبټ آباد کې پیدا او د نظامي عملیاتو په پایله کې له منځه یوړ.
د افغانستان د سرپرست حکومت چارواکي د سپټمبر ۱۱مه د هېواد په تاریخ کې یوه توره ورځ بولي او وایي، امریکا د خپل ۲۰ کلن حضور پر مهال ډېر ظلمونه وکړل.
په قطر کې د اسلامي امارت د سیاسي دفتر رییس سهېل شاهین وايي: « امریکا په لومړي سر کې پرله پسې تورونو لګول او د جګړې ګواښونه به یې کول. بالاخره یې د ۲۰۰۱ کال د اکټوبر په ۷ نېټه پر افغانستان یرغل وکړ. موږ له رسنیو سره د مرکو په لړ کې ورته وویل او روښانه مو کړه چې ښايي دا جګړه اوږده شي خو ماتې به د یرغلګرو وي او داسې به له دې هېواده شړل کېږي لکه نور تېر یرغلګر.»
له ۲۰ کاله خونړۍ جګړې وروسته، بهرني ځواکونه د ۲۰۲۱ کال د اګسټ پر ۳۱مه له افغانستانه ووتل.
دغه جګړه امریکا ته په دوه ټرېلیونه ډالره لګښتونو پرېوته، خپل ۲ زره ۴۶۰ سرتېري یې له لاسه ورکړل او ۲۱ زرو ډېر ټپيان شول.
