د د دولتي ادارو د یوکلنو لاسته راوړنو د تشرېح پرګرام په لړ کې دا ځل د پوهنې وزارت خپل کلنی راپور له رسنیو سره شریک کړ.
په دې راپور کې د زده کوونکو د شمېر زیاتوالي، د ښوونکو د ظرفیتونو لوړوالي، د وزارت د بودیجې لګولو، د دیني مدرسو د فعالیتونو، په ښوونځیو کې د کتابونو ویش، ښوونځیو ته د لاربراتوارونو ورکولو او یو شمېر نورو موضوعاتو په اړ معلومات ورکړل شول.
د دغه وزارت د اسلامي زده کړو مرستیال کرامت الله اخوندزاده وايي، تېر کال په دولتي او خصوصي ښوونځیو کې څه باندې ۱.۴ میلیونه نوي زده کوونکي جذب شوي چې له دې سره د ټولو زده کوونکو شمېر ۱۰ میلیونه ۹۱۴ زره او ۳۸ تنو ته ورسېد.
اخوندزاه زیاتوي: « په ټول هېواد کې ۱ میلیون او ۴۴۵ زره ۸۴۰ تنه نوي زده کوونکي د عمومي زده کړو په دولتي او خصوصي ښوونځیو کې جذب شوي. د نویو زده کوونکو له جذبېدو سره د عمومي زده کړو د ټولو زده کوونکو شمېر ۱۰ میلیونه، ۹۱۴ زره ۳۸ تنو ته رسېږي.»
اخوندزاده وايي، د پوهنې وزارت په چوکاټ کې ۳۱۶ ښوونځي نوي رامنځته شوي چې له ډلې یې ۲۱۰ خصوصي او پاتې دولتي دي.
د اخوندزاده په خبره، په تېر کال کې له لومړي تر دوولسم ټولګي پورې څه باندې ۱۶ میلیونه او ۸۸ زره ټوکه درسي کتابونه چاپ او پر ښوونځیو ویشل شوي دي.
هغه زیاتوي:« د هېواد پر کچه ۳۱۶ ښوونځي نوي تأسیس شوي چې له ډلې یې ۱۰۶ بابه دولتي او ۲۱۰ بابه خصوصي دي. د عمومي زده کړو له لومړي تر دوولسم ټولګي پورې ټولټال ۱۶ میلیونه، ۱۸۸ زره ۹۳۹ ټوکه درسي کتابونه ښوونځیو ته وېشل شوي دي. په ټول هېواد کې ۶۱۷ زره ۹۷۸ ټوکه درسي کتابونه د اسلامي زده کړو مرکزونو ته هم وېشل شوي دي.»
له شپږ ټولګي پورته د نجونو زده کړو په تړاو د پوهنې وزارت دریځ هماغه پخوانی دی چې په خبره یې، دغه ښوونځي به تر امرثاني همداسې تړلې وي.
چارواکي وايي، دامهال په ټول هېواد کې ۱۸ زره ۳۳۷ ښوونځي فعال دي چې له ډلې یې ۳ زره ۴۳۹ خصوصي ښوونځي دي او په دولتي ښوونځیو کې۷ زره ۶۳۴ لومړني، ۴ زره ۴۳۹ منځني او ۶ زره ۲۶۴ لېسې دي.
د پوهنې وزارت کلنی راپور دغه راز زیاتوي، په ټول هېواد کې ۲۱ زره ۲۵۷ د اسلامي زده کړو مرکزونه فعاله دي چې په کې دیني مدرسې، دارالحفاظونه، دارلایتامونه او دارالعلومونه شامل دي.
د چارواکو په خبره، د تېر کال لپاره په ټولیزه توګه څه باندې ۳۲ میلیارده افغانۍ بودیجه ورکړل شوې وه چې ۹۸ سلنه یې مصرف کړې ده.
د پوهنې وزارت وايي، د کوچیانو او معلولیت لرونکو کسانو لپاره یې هم د زده کړو زمینه برابره کړې او دا مهال زرګونه زده کوونکي په زده کړو بوخت دي.
