د دولتي ادارو د یوکلنیو لاسته راوړنو د تشرېح په دوام د ستندرد ملي ادارې د چهارشنبې پر ورځ د (۱۴۰۳ کال د وږي پر۱۴ مه) خپلې یو کلنې لاسته راوړنې له رسنیو سره شریکې کړې. دغه اداره وايي، په تېر کال کې یې زرګونه ټنه خوراکي او خوراکي توکي ارزولي، د ادارې د قانون په طرح کې یې تعدیدلات راوستي او همداراز په میلیاردونو افغانۍ عواید یې راټول کړي دي. د یادې ادارې د دفتر رییس وحید احمد بدري وايي، په تېر یوه کال کې له درې نیم میلیونه ټنه زیات نفتي توکي او اوبلن ګاز ارزول شوي، ۱۲۸ زره ټنو زیات نفتي توکي غیرمعیاري او بې کیفیته تثبیت شوي او هېواد ته یې له راوړلو مخه نیول شوې. د بدري په خبره، له ۷ میلیونو ټنو زیاتو ودانیزو توکو کیفیت هم ارزول شوی چې په کې ۱۵۲ ټنه بې کیفیته تثبیت شوي او د واردولو مخه یې نیول شوې. بدري زیاتوي: «د تېر ۱۴۰۲ کال په اوږدو کې د دې ادارې له خوا د هېواد په بندرونو کې ۳ میلیونه ۷۸۹ زره ۴۱۵ ټنه ګازو، نفتي توکو او مشتقاتو کیفیت ارزول شوي دي. له دې ډلې ۱۲۸ زره ۸۱۱ بې کیفیته تثبیت شوي او هېواد ته یې له راوړلو مخه نیول شوې. همدارنګه د هېواد په بندرونو کې د ۷.۳ میلیونو ټنو ساختماني توکو کیفیت هم ارزول شوی چې له ډلې یې ۱۵۲ ټنه بې کیفیته تثبیت شوي او هېواد ته یې له راوړلو مخنیوی شوی.» په ورته وخت کې بدري خبرداری ورکوي، چې د بې کیفیته توکو واردونکو او په کور دننه تولیدونکو لپاره یې د شرعي سزا د ورکړې طرح وروستۍ کړې او د منظورۍ لپاره یې سترې محکمې ته لیږلې چې د قانوني مراحلو له تېرېدو وروسته به پلې او له مخې به یې له سرغړونکو سره شرعي چلن وشي. بدري زیاتوي: «د ستندرد ملي ادارې له اصولو څخه سرغړوونکو، هېواد ته د بې کیفتیه توکو واردوونکو او په هېواد کې د بې کیفتیه توکو تولیدوونکو ته د شرعي سزاګانو ورکولو طرح نهايي شوې او د منظورۍ لپاره سترې محکمې ته استول شوې چې له منظورۍ وروسته به یې سرغړوونکو ته له مخې سزا ورکړل شي.» د یادې ادارې چارواکي د نویو ستندردونو د تدوین خبره هم کوي او وايي، په ټوله کې ۸۰۰ ستندردونه تدوین شوي خو په تېر یوه کال کې د نفتي، ساختماني، د مدیریت کیفیت، چاپیریال ساتنې، کیمیا او پلاستیک، کرنې، خوراکي توکو، د نساجۍ او چرم اړوند، مخابراتو، روغتیا او طبي وسایلو په برخه کې ۹۱ نوي ستندردونه جوړ شوي چې له ډلې یې ۲۴ تایید شوي هم دي. د ستندرد ملي ادارې تخنیکي مرستیال محمد آصف قانت: « ستندرد ملي ادارې په هېواد کې د ستندردونو د تدوین په برخه کې بنسټیز کارونه ترسره کړي. د ستندردونو د تدوین کمېټې جغرافیايي، اقلیمي، چاپېریالي او اقتصادي شرایطو ته په کتو له ۸۰۰ څخه زیات ستندرونه او د ساختماني چارو لپاره کوډونه تدوین کړي دي.» په تېر یوه کال کې دغې ادارې د خپلو ارزونو په پایله کې څه باندې دوه میلیارده افغانۍ عواید راټول کړي او وايي، په کور دننه د تولیدي کارخونو د تولیداتو معیاري کولو هڅې پیل شوې دي. یاده اداره زیاتوي، په تېر کال کې د ستندرد ملي ادارې په قانون کې د تعدیل ترڅنګ، فقهي تخریج هم تره شوی او د قانوني پړاوونو تېرولو لپاره عدلیې وزارت ته استول شوی دی. د ستندرد ملي ادارې له ټولو سوداګرو او صنعتکارانو وغوښتل چې خپلې چارې د ټاکل شویو ستندردونو او معیارونو سره برابر کړي.
