د کرنې، اوبو لګولو او مالدارۍ وزارت د یکشنبې پر ورځ د (۱۴۰۳ کال د وږي پر ۱۱ مه) په هېواد کې د کرنې او مالدارۍ سکټور د ودې په موخه د کرنې پرمختیا صندوق پرانیست.
چارواکي وايي، د اسلامي مالي محصولاتو په رڼا کې به د مشارکت او مضاربت له لارې د بزګرانو، مالدارو او کوچنیو صنعتکارو لاسنیوی وشي، څو دغه سکټورونه پر پښو ودرېږي.
دوی د کرنې پراختیايي صندوق د اسلامي مالي محصولاتو (مشارکت او مضاربت) ترعنوان لاندې جوړې شوې غونډې ته د وینا پر مهال وویل، هڅه کېږي، چې په هېواد کې د کرنې او مالدارۍ سکټور د مشارکت او مضاربت له لارې پر پښو ودرول شي.
د کرنیزې پرمختیا صندوق د عامل پلاوي رییس عبدالغفور غفاري وايي: « دا چې د کرنیزې پرمختیا صندوق اوس د مشارکت او مضاربت محصول تایید شوی او عملي کېدو ته یې ژمن دی، نو ټول خصوصي شرکتونه، هغه صنعت کاران چې د کرنیزو توکو په پروسېس، بسته بندۍ او ساتنه کې او هغه سوداګر چې د کرنیزو توکو او مالدارۍ محصولاتو په صادراتو کې مصروف وي او په دې برخه کې هغه امکانات چې موږ یې په لاس کې لرو، کولی شي د کرنیزې پرمختیا صندوق له مرکزي او ولایتي څانګو سره اړیکه ونیسي او خپل د مشارکت او مضاربت جوړ کړی پلان زموږ له همکارانو سره شریک کړي. وروسته له غور او کره کتنې که مناسب وګڼل شي، په ګډه به له ټولو زیربط ادارو سره په همغږۍ لازم اجراأت ترسره کړي.»
غفاري وايي، هر بزګر او مالدار ته به د مشارکت او مضاربت له لارې په یو کال کې له ۱۰ زرو تر ۱۰۰ زره افغانيو مالي مرسته ورکړل شي.
د هغه په خبره، د کرنې او مالدارۍ وزارت ۷.۵ میلیارده افغانۍ د مشارکت او مضاربت په رڼا کې د هېواد کرنې او مالدارۍ سکټور د ودې په موخه ځانګړې کړې دي.
غفاري زیاتوي: «په دې اړه ډېرې سروې ګانې ترسره شوې دي، د مشارکت موضوع زموږ لپاره ډېره مهمه ده، دا چې روسیې، د ختیځې اروپا هېوادونو، ترکیې او نورو هېوادونو د خپل خصوصي سکټور په مرسته په زېربنايي برخو کې زیات پرمختګ کړی. په دې کې شک نه شته او تجربو ثابته کړې چې کله خصوصي سکټور وړتیا، تخصص او پانګه ولري او په شفافه توګه د قواینو او مقرراتو په رڼا کې د دولتي سکټور پر مشرۍ سره په زیربنايي پروژو کې پانګونه وکړي، د هېواد د آبادۍ لپاره پانګه مدیریت او عموي وړتیا څو ځله زیاتېږي. د دولتي عامه سکټور او خصوصي سکټور ګډ کار په افغانستان کې ډېر مهم دی، ځکه چې موږ د پانګې له کمښت سره مخ یو او د مدیریت په پروژو کې د خطرونو د وېش او اغېزمنتوب په ټولو ساحو کې ستونزې لرو.»
د کرنې، اوبو لګولو او مالدارۍ وزارت شمېرې ښيې، چې په هېواد کې نږدې ۸۰سلنه وګړي د کرنې او مالدارۍ په سکټور کې پر کار بوخت دي.
د وزارت په خبر، هڅه کېږي، چې یاد سکټور په عصري وسایلو سمبال او خلکو ته لا ډېر کاري فرصتونه برابر شي.
د کرنې، اوبو لګولو او مالدارۍ وزارت چارواکو په تېر کې د مشارکت او مضاربت اصول د شریعت له مخې په سود ولاړ وګڼل، خو وايي، دوی په تېرو درېیو کالو کې هڅه وکړه، چې مشارکت او مضاربت له شرعي اصولو سره سم کړي.
