د حکومتي ادارو د یو کلنو لاسته راوړنو د تشرېح په دوام، پرون د شنبې پر ورځ د (۱۴۰۳ کال د وږي پر ۱۰ مه) د ازموینو ملي ادارې د خپل تېر کال فعالیتونو او لاسته راوړنو راپور له رسنیو سره شریک کړ.
د ازموینو ملي ادارې چارواکي وايي، د ۱۴۰۳ کال د کانکور ازموینه یې په پوره روڼتیا اخیستې اوله لارې یې په لومړي ظرفیت کې ۴۵ زره ۳۴ تنه ګډونوال تحصیلي بنسټونو ته بریالي شوي او دغه راز په دویم ظرفیت کې له ۳۶ زرو ډېرو کسانو د لوړو زده کړو موسسو او پوهنتونو ته لاره پیدا کړې .
د ازموینو ملي ادارې سرپرست شیخ عبدالباقي حقاني وايي: « د ۱۴۰۳ کال ازموینه واخیستل شوه؛ په لومړي ظرفیت کې ۴۵ زره ۳۴ تنه نوي ځوانان تحصیلي بنسټونو ته ور وپېژندل شول. په دویم ظرفیت کې ۳۶ زره ۶۰۰ خالي سېټونه بیا اعلان ته سپارل شول، د لوړو زده کړو خصوصي موسسو ته واجد شرایط محصلانو ورته نوم لیکنه کړې او پایلې یې په شفافه بڼه اعلان شوې دي.»
د دغې ادارې د پوښتنو بانک تنظیمولو چارو ادارې رییس عرفان الله عباد وايي، په تېر یوه کال کې یې ۵۸ وړو او سترو ازموینو لپاره د ګډونوالو نوم لیکنې فورمونه تنظیم کړي او همدا راز د پوښتنونو او ځوابونو چارې هم په بشپړه روڼتیا سره تنظیم او ترتیب کړې دي .
عباد زیاتوي: « په تېر یوه کال کې د ۴۸ بېلابېلو ډله ییزو ازموینو لپاره د ۲۰۰ تنو ګډونوالو د نوم لیکنې فورمې تنظیم شوې، د پوښتنو پاڼې چاپ شوې، ځواب پاڼې، کارتونه او حاضري چمتو شوي او همدارنګه د ازموینې اخیستونکي پلاوي تنظیم او استول په ډېر شفاف ډول ترسره شوي دي.»
دغې ادارې په تېر یوه کال کې په ټولیزه توګه له ۱۷۰ زرو زیاتو کسانو څخه ازموینې اخیستې، چې نږدې نوي زره یې بېلابېلو پوهنتونونو ته معرفي کړي دي .
