د افغانستان د اقتصادي بریا او پرمختګ په نوم جوړ شوی څلور ورځنی نندارتون پای ته ورسېد. د دې نندارتون په ۴۰۰ غرفو کې د افغانستان تولید کړي محصولات او لاسي صنایع نندارې ته وړاندې شوي وو، چې نږدې نیمايي غرفې ښځينه سوداګرو ته ځانګړې شوې وې.
سوداګره نسرین وايي: « موږ دلته تجارت زده کړ، له ګڼو شرکتونو سره مو قراردادونه وشول، ځينو شرکتونو د اوږدمهاله پور راکولو ژمنې وکړې. د نندارتون ادارې هم ژمنه وکړه،چې موږ ته به دلته یوه دایمي نمایندګي راکوي.»
سوداګره ناهېده بیا وايي: «نندارتون مثبتې اغېزې لري، موږ کولی شو، دلته خپل محصولات د فروش لپاره کېږدو، له شرکتونو سره قراردادونه وکړو او خپل فرهنګ خلکو ته وښيو.»
له تېرو هغو سره د اوسني نندارتون توپير دا وه، چې د لرې پرتو ولايتونو سوداګرو ښځو هم په کې ګډون درلود او وايي، په دې نندارتون کې یې د کاروبار د ودې په اړه مهم مهارتونه زده کړل.
سوداګرې ښځې د دې نندارتون څخه ترلاسه کړې تجربې ته په کتو، له سرپرست حکومته غواړي، چې د ښځو او په ټوله کې د کوچنیو کاروبارونو د ودې لپاره دې په کور دننه او بهر نور نندارتونونه هم جوړ کړي.
سوداګره مریم محمدي وايي: « که چېرې زموږ دغه کار پراختیا پيدا کړي، د ښځو پر ژوند به ډېر مثبت اغېز ولري. ښځې کولی شي، له دې لارې عاید ترلاسه کړي او د کورنۍ په لګښتونو کې ونډه واخلي. تاسو وینئ، چې دا مهال ښځې په ادارو کې کار ته لاسرسی نه لري، خو که له سوداګرو ښځو ملاتړ وشي، ډېرې ښځې به د کار څښتنانې شي.»
د افغانستان ډېری نندارتونونه په پلازمېنه کابل او یا لویو ښارونو کې جوړیږي، خو سوداګره انېلا په نورو ولایتونو کې هم د ورته نندارتونو جوړول غواړي.
هغه زیاتوي: « ما د ګنډ افغاني جامو له یوه شرکت سره قرارداد وکړ. زه له اسلامي امارت غوښتنه کوم، دغه ډول نندارتونونه د هېواد په ټولو ولایتونو کې جوړ کړي، ترڅو هرڅوک وکولی شي، خپل تولیدات او لاسي صنایع نندارې ته وړاندې کړي.»
له دې سره د نندارتون مسوولان وايي، په ټاکل شویو څلورو ورځو کې له دې نندارتون شاوخوا ۸۰ زره کسانو ليدنه کړې او د توکو پر پلور سربېره، سوداګرو او شرکتونو د خپلو کاروبارونو د ودې لپاره خپلمنځي هوکړې هم کړې دي.
د افغانستان اقتصادي بریا او پرمختګ نومي نندارتون مسوول فرید نادري وايي: «له هغې ورځې چې نندارتون جوړ شوی تر دې وروستۍ یا څلورمې ورځې پورې له اتیا زرو ډېرو کسانو لیدنه کړې. یو شمېر شرکتونو فروشات او قراردادونه هم درلود، په ځانګړې توګه د ښځينه جامو او لاسي صنایعو په برخه کې. ټاکل شوې نیږدې راتلونکې کې په جلاآباد ښار، مزار شریف او بیا بېرته کابل کې نور نندارتونونه جوړ کړو.»
تر اوسه د سوداګرۍ او صنعت وزارت چارواکو په نندارتونو کې د لاسليک شویو قراردادونو د ارزښت په معلومات نه دي ورکړې، خو له دې وړاندې د دې وزارت سرپرست ويلي و، چې د ورته نندارتونو په جوړولو سره هڅه کوي کورني محصولات خلکو ته معرفي او ورته د پلور زمينه برابره کړي.
