که له یوې خوا په وروستیو کې د خوست ښار بڼه نویو او دنګو ودانیو تر ډېره معیاري او ښکلې کړې، خو لاهم په دغه ښار کې لسګونه کاله پخوا جوړې ودانۍ شته، چې اوس د ویجاړېدو له ګواښ سره مخ دي او د ښار اوسېدونکو لپاره یو جدي ګواښ ګڼل کېږي.
د خوست ښار اوسېدونکی محمد یعقوب خان وايي: « زړې ودانۍ دا مهال لوی خطر دی. له یوې ودانۍ پر ما لویه ډبره راولوېده،خو زه ترې بچ شوم. په کار ده،چې ژر تر ژره یې غم وخوړل شي؛ ځکه که زلزله راغله ډېر خلک به ترې لاندې شي.»
په ورته مهال، د دغه ولایت یو شمېر نور اوسېدونکي بیا وايي، په ښار کې پخوانیو ودانیو که له یوې خوا د ښاریانو ژوند له ګواښ سره مخ کړی، بله خوا یې د ښار ښکلا ته هم زیان رسولی او پر دې سربېره یې ښاریانو ته ګڼې نورې ستونزې هم جوړې کړې دي.
دوی له ځايي مسوولینو غواړي چې، د یادې ستونزې د هواري په تړاو جدي ګامونه واخلي.
د خوست ښار یو تن اوسېدونکی نجیب وايي: « که زلزله راغله، دا ودانۍ ټولې ورانېږي او په دې سره به درانه مالي او ځاني زیانونه واوړي.»
همدارنګه د خوست بل اوسېدونکی محب الله بیا وايي: « دا زاړه مارکېټونه اکثریت د روسانو د وخت دي او د انقلاب پر مهال زیانونه هم ورته رسېدلي. خوست کې زلزلې ډېرې کېږي، که چېرې زوروره زلزله راشي، زیانونه به یې زیات وي.»
د خوست ښار اوسېدونکی سبیل خان وايي: « دا ودانۍ ډېرې زړې شوې او ښار یې هم بدرنګ کړی. که دا ودانۍ نوې شي، ښار به هم ورسره ښایسته شي.»
اخوا ځایي مسوولین وایي، د خوست ښار د یادې ستونزې د هواري په تړاو یې هڅې پیل کړې او په دې برخه کې له مرکزي حکومت سره پر ګډه د ښارونو پراختیا او اساسي رغونې په اړه ځینې پلانونه به ډېر ژر پلي شي.
د خوست ولایت د کور او ښار جوړونې رییس حضرت جمال وايي: « په پلان کې ده، چې د دغو ودانیو لپاره نوې نقشې پلې کړو. موږ ته لارښوونه شوې، چې په هرو پنځو کالو کې د ښار پر نقشه له سره کتنه وکړو.»
که څه هم خوست ښار کې په تېرو دوو لسیزو کې د یوه پرمختللې ښار ګڼې اسانتیاوې رامنځته شوې، خو لا یې هم تر ډېره بڼه پخوانۍ ده او له همدې امله د دغه ولایت اوسېدونکي ټینګار کوي، چې سرپرست حکومت دې یې د پراختیا او اساسي رغونې ته ځانګړې پاملرنه وکړي.
