بلخاب د سرپل یوه له هغو غرنیزو ولسوالیو ده، چې له مرکزه ۲۰۰ کلیومټره لرې پرته ده او له بامیانو بلخ او سمنګان ولایتونو سره ګډه پوله لري.
د مرکز او دې ولسوالۍ ترمنځ نښلونکې لارې خورا ويجاړې دي، د بلخاب ولسوالۍ اوسېدونکي او موټر چلونکي وايي، په دغه لار د تګ راتګ پر مهال له ګڼو ستونزو سره مخ وي.
یو تن موټر چلوونکی غلام سخي: « موږ د امنیت په لحاظ هېڅ ډول ستونزه نه لرو. زموږ ستونزه د لارو ده. موږ کابل ته د بامیانو له لارې ځو او په دوو ورځو کې رسېږو. موږ نه شو کولی، د خرابو لارو له امله خپل ناروغان تر روغتون پورې ورسوو.»
ورته محال، د بلخاب ولسوالۍ سیمه ییز مسوولين هم ستونزه مني، خو وايي، له اړونده مسوولو ارګانونو او چارواکو سره یې شريکه کړې او په دې برخه کې د اړینو ګامونو پورته کېدو په تمه دي.
د بلخاب ولسوالۍ ولسوال احمد حسین سنګر دوست وایي: « د بلخاب سړک د ډبرو سکرو لېږدوونکو لاریو او دغه راز سېلابونو په وسیله ویجاړ شوي. موږ د ولایت مقام ته وړاندیز کړی او تمه لرو، چې ژر د بیا رغولو ګامونه پورته شي.»
د سرپل په بلخاب ولسوالۍ کې شاوخوا ۱۰۰ زره کورنۍ ژوند کوي، چې د ژوند له اړينواسانتياوو بې برخې دي.
دوی د خپلو ستونزو د حل په موخه د لازمو پروژ د پلې کېدو غوښتنه لري.
