په کندهار ښار کې د شنو ځایونو او پارکونو د کموالي له امله هوا ککړه شوې او پر خامه سړکونو د موټرو تېرېدو له امله دوړې هم ډېرې شوې دي.
ښاريان وايي، په ښار کې د شنو ځايونو نه شتوالی د هوا او چاپېريال د ککړتيا مهم لاملونه بولي او په خبره یې ښاروالۍ بايد د ښار د زرغونتيا لپاره لويې پروژې عملي کړي.
دغه راز دوی وايي، د هوا د ککړتیا له امله خلک او په ځانګړي ډول ماشومان په بېلابېلو تنفسي ناروغیو اخته شوي.
د دوی په خبره، خلک باید د شنو سیمو په ساتنه کې له سرپرست حکومت سره مرسته وکړي، ترڅو د هوا ککړتیا سربېره د ناروغیو مخنیوی هم وشي.
د کندهار ښار یو تن اوسېدونکی احمدشاه وايي: « که چېرې شنې ساحې او پارکونه جوړ شي او سړکونه پاخه شي، نو د ښار چاپېریال به ورسره پاک شي. زه له موټر لرونکو هم غوښتنه کوم، چې خپل موټر ترمیم کړي ترڅو د دود او کاربن ډای اوکسایډ تولید کم شي.»
بل خوا د کندهار ښاروالۍ مسولین هم وايي، ښاروالۍ د ښار زرغونتیا په برخه کې هڅه کوي او یوازې تېر کال يې ۱۴ زره نوي نیالګي کېنولي دي.
د مسولینو په خبره، ښاروالۍ هوډ لري، چې د ښار د زرغونتيا لپاره نورې پروژې هم پلې کړي.
د کندهار ښاروالۍ ویاند سیف الله عاصم وايي:« کندهار ښاروالۍ په پام کې لري، چې پر هغو سړکونو او واټونو نیالګي کېنوي، چې نوي جوړ شوي یا له پخوا څخه پرې ونې نه وې کېنول شوې.»
کندهار ښار کې د هوا ککړتيا زياتوالي روغتيايي ستونزې هم رامنځته کړې او ښاريان غوښتنه کوي، چې د دې ستونزې د هواري لپاره دې ژر تر ژره ګامونه پورته شي.
