د بلخ پوهنتون د ژبو او ادبیاتو پوهنځي له پښتو څانګې څخه ۱۵ مه دوره محصلین فارغ شول،چې د فراغت په موخه یې غونډه نیول شوې وه.
که څه هم له لوړو زده کړو تازه فارغ شوي ځوانان د خپل فراغت جشن ته خوښ دي او نمانځنه یې کوي، خو راتلونکي برخلیک ته بیا زړه خوري.
دوی وايي، یا به پر قاچاقي لارو بهرنیو هېوادونو ته ځي او یا به هم درنو کارونو ته اوږه ورکوي.
له نویو هیلو سره راټوکېدلي ځوانان پر سرپرست حکومت غږ کوي چې په دولتي ادارو کې ورته کاري فرصتونه برابر کړي.
تازه فارغ شوی محمد ابراهیم ادب پال وايي: « له اسلامي امارت څخه غوښتنه کوو، چې ځوانانو ته د کار زمینه برابره کړي. زموږ ملګري په هره برخه کې ډېر پیاوړي دي او له هر ډول اداري کارونو سره بلدتیا لري.»
تازه فارغ شوی عبدالوهاب وايي: « له حکومت څخه مې یوازینۍ هیله دا ده، چې ځوانانو ته په دولتي ادارو کې کار ورکړي ترڅو له دې لارې خپل کور او هېواد ته خدمت وکړي.»
ورته مهال، د بلخ پوهنتون یو شمېر استادان وایي، څلور کاله یې په ورین تندي او مسلکي ډول زده کړیالان روزلي، خو اندېښنه لري چې تکړه او وړتیا لرونکي شاګردان یې له فراغت وروسته د کاري فرصت نه شتون له امله نوروهېوادونو ته مخه کوي.
د بلخ پوهنتون د ژبو او ادبیاتو پوهځي د پښتو څانګې مشراسدالله ناصري وایي: «کله چې یو محصل ۱۰ کاله تحصیل کوي، دولت مکلف دی چې دوی ناهیلي نه کړي او لپاره یې کاري فرصتونه برابر کړي او د تخصص لپاره یې بهرنیو هېوادونو ته واستوي.»
سره له دې چې دا مهال د ټول هېواد پر کچه د بېکاري او له امله یې بېوزلي په لوړ حد کې دي، خو له دې هم خواشینوونکې خبره دا ده، چې لوستي ځوانان د کاري فرصتونو نه شتوالي له امله ناهیلي د خپل وطن پرېښودو ته اړ کېږي.
په همدې حال کې د بلخ ولایتي مسوولین د کارې فرصتونو برابرولو په تړاو له خپلو هڅو خبر ورکوي.
د بلخ ولایت د اطلاعاتو او کولتور ریاست د ځوانانو چارو آمر سلطان محمد توخي وایي: «زموږ اصلي هدف ځوانانو ته د کار او اشتغال برابرول دي. موږ په دې کار کوو، چې دوی ته کاري فرصتونه رامنځ ته کړو. هرکال زرګونه کسان له پوهنتونونو څخه فارغېږي. زموږ پیغام دغو کسانو ته دا دی چې ځانونه ورسوي، دولت او مسوولین به دوی ته د کار زمینه برابره کړي.»
له دې سره، پر دولت او دولتي ادارو نیوکه کېږي چې د لوړو زده کړو او تخصص لرونکو کسانو ته پاملرنه نه کوي او پرځای یې هغه کسان په دندو ګومارل شوي، چې له دوی سره اړیکې ولري او یا یې په ۲۰ کلنه مبارزه کې برخه اخیستې وي.
له دې ټولو سره سره ټینګار کېږي، چې نه باید لوستي ځوانان له خپلو زده کړو پښېمانه او د هېواد پرېښودو ته اړ ایستل شي.
