افغانستان لپاره د امریکا شارژدافیره کرن ډېکر، چې دا مهال خپلې چارې له قطر پر مخ وړي، د دوحې له درېیمې ناستې وروسته په نږدې راتلونکې د څلورمې ناستې جوړېدو خبر ورکړی.
ډېکر له یو شمېر خبریالانو سره پرلیکه ناسته کې که څه هم د ناستې کره نېټې په تړاو جزییات نه دي ورکړي؛ خو ویلي يې دي چې د یادې ناستې له جوړېدو وړاندې باید څو نورې وړې ناستې ترسره شي.
ډېکر دغه راز ویلي، د افغانستان لپاره د ځانګړي استازي د ټاکلو موضوع لاهم پر خپل ځای ده او په خبره یې د دوحې په درېیمه ناسته کې یې د سرپرست حکومت استازي ته د افغانستان د شاته پاتې کېدو خبرداری ورکړی.
هغې زیاته کړې:« د هېوادونو استازو یو په بل پسې طالبانو ته دا خبرداری ورکړ، که افغانستان خپل نیمايي وګړي له صحنې لرې کړي، نو بریالي کېدای نه شي. دغو استازو پر افغانستان غږ وکړ، چې د ملګرو ملتونو ټولو کنوانسیونونو او تړونونو ته ژمن پاتې شي؛ خو پر ملګرو ملتونو یې هم د داسې یوې پروسې او د یوه لارښود د جوړولو غږ کړی، چې د افغانستان د حالاتو خپلواکه ارزونه روانه وساتي.»
په ورته مهال په افغانستان کې د ملګرو ملتونو سیاسي استازولۍ مشرې روزا اتونبایوا د سرپرست حکومت او نړیوالې ټولنې ترمنځ اړیکو ته اشاره کړې او پر لوړه کچه خبرې اترې یې د دواړو لوریو ترمنځ د اړیکو د رغېدو لامل ګڼلي.
نوموړې د ریاست الوزرا له سیاسي مرستیال مولوي عبدالکبیر سره په لیدنه کې دغه راز ویلي، نړیواله ټولنه غواړي د افغانستان له سرپرست حکومت سره اړیکې ټینګې کړي.
د ارګ خبرپاڼې یوه برخه:« اتنبایووا زیاته کړه، په لوړه کچه د اسلامي امارت او نړیوالې ټولنې تر منځ خبرې د اړیکو د رغېدو لامل کېدای شي. همدا راز له اسلامي امارت سره اړیکې لرل د غربي ټولنې غوښتنه ده.»
هغې د دوحې له وروستۍ ناستې وروسته د افغانستان د خصوصي او بانکي سکټورونو د ملاتړ او له نشه یي توکو سره د مبارزې د څرنګوالي په هکله د دوو جلا کمېټو د جوړولو خبر ورکړی چې په خبره یې له جوړېدو څخه یې اصلي موخه په یادو برخو کې د ستونزو موندل او ورته د حللارو لټول دي.
د ریاست الوزرا سیاسي مرستیال د ملګرو ملتونو له لوري د سرپرست حکومت د شرایطو منل مهم ګام بللی او له نړۍ سره یې د رغنده او مثبتو اړیکو د جوړېدو ترڅنګ د تعامل غوښتنه کړې.
د افغانستان لپاره د امریکا شارژدافیرې داسې مهال د دوحې د څلورمې ناستې د جوړېدو خبر ورکړی چې د ملګرو ملتونو په نوښت نږدې یوه میاشت وړاندې د جون پر ۳۰ مه په قطر کې د دوحې دوه ورځنۍ درېیمه ناسته ترسره شوه.
