د عدلیې وزارت مسوولین له دې ازموینې څخه اصلي موخه راتلونکي لپاره د مدافع وکیلانو د علمی ظرفیت معلومول او په دندو ګمارل یادوي.
د عدلیې وزارت مسلکي مرستیال عبدالکریم حیدر په ازموینه کې د پوره روڼتیا ډاډ ترڅنګ وايي، بریالي کسان به له نهه میاشتني ستاژ دورې وروسته، چې ټاکل شوې په انلاین بڼه ترسره شي، د کار جواز لیکونه تر لاسه کوي.
عبدالکریم حیدر زیاتوي:« کوم کسان چې په دې پروګرام کې بریالي کیږي او هغه کسان چې بیا ستاژ ته ورپېژندل کیږي، د ستاژ دوره به په ۹ میاشتو کې په دوه سمسترو کې وايي. موږ هڅه کوو چې متقاضیانو ته اړین سهولتونه برابر کړو.»
بل پلو د یاد وزارت د مدافع وکیلانو رئیس رحمت الله حقاني وايي له ازموینې وروسته هغو بریاليو متقاضیان ته چې وار د مخه یې د وکالت درې کلنه تجربه لرلې وي، له ستاژ دورې پرته ورته د وکالت جواز لیکونه ویشي.
رحمت الله حقاني په خبره، په چارو کې د اسانۍ لپاره یې د هېواد په ټولو زونونو کې د مدافع وکیلانو امریتونه رامنځته کړي او د مدافع وکیلانو ټولنې چې له دې وړاندې یې په خپلواکه بڼه فعالیت درلود د عدلیې وزارت اړوند د نوي ریاست تر کچې لوړه کړې.
حقاني همداراز وویل:« دا چې په تېرو کلونو کې د مدافع وکیلانو ټول اجرأت په مرکز کې ترسره کېدل چې له امله یې د لرو پرتو ولایتونو مراجعین له یو لړ ستونزو سره مخ و، خو په دې وروستیو کې د مدافع وکیلانو د ریاست له لوري د اسلامي امارت مقام ته په زونونو کې د امریتونو د منظروېدو وړاندیز وشو، چې د روان کال په اولو کې د اسلامي امارت مقام له لوري په زونونو کې د مدافع وکیلانو امریتونه منظور شول.»
بل پلو د ازموینې ګډونوال د ازموینې له شفافیت څخه د رضایت ترڅنګ له اړونده مسوولینو غواړي چې مدافع وکیلانو ته د جواز لیکونو د ورکړې پروسه اسانه او په دې برخه کې اړین سهولتونه رامنځته کړي.
د ازموینې یو تن ګډونوال ولي الله عاشوري وايي:« له ازموینې خوښ یو، څکه پروسه یې تر ډېره پاکه ده.»
یو بل تن ګډونوال احمدالله سلطاني ورته خبره کوي خو زیاتوي:« کله مې چې نوم لیکنه وکړه د ریاست له لوري د قانون سره سم ماخذونه راکړل شول او زه هلیه من یم چې ټولې پوښتنې د راکړل شویو ماخذونو سره سمې وي.»
دا په داسې حال کې ده چې د عدليې وزارت د مسوولینو په وینا واک ته د اسلامي امارت له رسېدو وروسته له دې وړاندې دوه ځله نور هم مدافع وکالت ته له سلګونه متقاضیانو څخه ازموینه اخېستل شوې چې موخه یې ټولنې ته په کار پوه او مسلکي کسانو ور پېژندل دي.
