له تېرو درېیو کلونو راهیسې اسلامي امارت په کراتو له نړیوالې ټولنې غوښتنه کړې چې اوسني حکومت سره رسمي توګه تعامل وکړي، خو نړۍ د سرپرست حکومت د سیاستونو او پر افغان ښځو د لګول شویو محدویتونو له امله دغو غوښتنو ته تر اوسه پورې مثبت ځواب نه دی ورکړی دی.
په قطر کې د اسلامي امارت سیاسي دفتر مشر سهیل شاهین له شمشاد سره خبرو کې ویلي، امریکا او نړیوالې ټولنې د اسلامي امارت پر چارواکو د بندیزونو نه لرې کول او له افغانستان سره د اړیکو نه عادي کول د تعامل پر وړاندې جدي خنډ دی او د دوحې له هوکړې ښکاره سرغړونه ده.
شاهین زیاتوي:« هو! همداسې ده، دا بندیزونه خنډونه دي، له یوې خوا ملګري ملتونه، نړیواله ټولنه وايي، چې موږ غواړو له اسلامي امارت سره تعامل وکړو، له بلې خوا هلته یې دېوالونه رامنځته کړي، په لاره کې یې دېوالونه رامنځته کړي، خنډونه یې رامنځته کړي، نو یو ځل باید دوی دا خنډونه لرې کړي، دا دېوالونه لرې کړي، ترڅو تعامل ته لاره برابره شي. یوازې په وینا باندې تعامل نه کېږي، تعامل عملي بڼه غواړي، نو زه پر نړیواله ټولنې او ملګرو ملتونو غږ کوم، که تعامل غواړي او په دې کار کې صادق وي، باید ټول هغه خنډونه اول په ګوته شي، چې د تعامل په مخکې کې خنډ دي او بیا له منځه ولاړ شي.»
شاهین زیاتوي، د ملګرو ملتونو د بندیزونو د نه لرې کېدو له امله دوی بېلابېلو هېوادونو ته د سفر په برخه کې له ستونزو سره مخ کړي او له ملګرو ملتونو غواړي چې پر سرپرست حکومت لګول شوي بندیزونه لرې کړي.
شاهین دغه راز وايي، افغانستان له نړۍ سره مشترکات لري او په خبره یې د مشترکاتو د تضمین لپاره دې سرپرست حکومت پر رسمیت سره وپېژندل شي.
هغه زیاتوي:« زه فکر کوم هغه مشترکات چې لرو، لکه دا اوس چې مخدره مواد، داسې نور ډېر مشترکات دي، هغه په ګوته شي، موږ غواړو هغه له نړۍ سره په ګوته کړو، موږ په هغه کې اماده یو، چې د دواړو هېوادونو پر مشوره باندې موږ په هغې کې همکاري وکړو، نو دا په هغه صورت کې ښه کېدی شي، چې د افغانستان اسلامي امارت پر رسمیت وپېژندل شي.»
شاهین وايي، سرپرست حکومت له نړیوالې ټولنې سره د رسمي تعامل غوښتونکی دی.
شاهین د دې مرکې یوې پوښتنې ته په ځواب کې وایي، د دوحې په درېیمه ناسته کې د امریکایي استازو سره په کتنه کې له هغوی یې غوښتني چې د افغانستان په هوایي حریم د بې پېلوټ الوتکو ګرځېدل د نړیوالو قوانینو او د دوحې هوکړې څخه ښکاره سرغړونې دي او د ودرېدو غوښتنه یې کوي.
په قطر کې د اسلامي امارت د سیاسي دفتر مشر سهیل شاهین وایي، د امریکا له بندیزونو سره سره اسلامي امارت اړیکې مخ په پراخېدو دي.
دغه راز نوموړی ټینګار کوي چې د اسلامي امارت پلاوي د دوحې د درېیمې غونډې په څنډه کې د زیاتو هېوادونو له استازو سره په لیدنه کې له هغوی غوښتي چې د افغانستان واقعیتونه له نږدې وګوري.
شاهین مني چې په نږدې راتلونکي کې به درې اروپایي هېوادونه په کابل کې خپل سفارتونه پرانیزي.
