د اسلامي امارت رهبر ملا هبت الله اخندزاده د سرپرست حکومت په کابینه کې ځېنې مهم چارواکي بدل کړي دي.
د نوموړي له لوري په يوه ځانګړې حکم کې د افغانستان بانک مخکېنی سرپرست هدایت الله بدري د شهاب الدین دلاور پر ځای د کانونو او پټرولیم وزارت د سرپرست او په خپله دلاور د افغاني سرې میاشتې ټولنې سرپرست په توګه ګومارل شوی.
د اسلامي امارت د ویاند مرستیال حمدالله فطرت وايي: « دغه موثریت ته په کتو د افغانستان اسلامي امارت مشرتابه د اسلامي امارت په کابینه کې یو لړ بدلونونه، تبدیلۍ او نوې ټاکنې ترسره کړي چې د چارو لا ښهوالي لامل به وګرځي.»
په نویو ګومارنو کې د افغانستان بانک مخکېنی مرستیال نور احمد اغا د دغه بانک سرپرست، دغه راز د افغاني سرې میاشتې ټولنې مخکېنی سرپرست مرستیال نورالدین ترابي د پېښو پر وړاندې د مبارزې د ملي ادارې د سرپرست او د افغاني سرې میاشتې ټولنې مخکېنی سرپرست مطیعالله خالص د چاپېریال ساتنې د ملي ادارې د سرپرست په توګه پر دندو ګومارل شوي دي.
حمدالله فطرت د چارواکو په مسوولیتونو کې بدلون اصل ګڼي او زیاتوې، چې مشرتابه یې دغه بدلونونه د ملي مصلحتونو او د ولس د اړتيا په پام کې نيولو سره راولي.
هغه وايي: « تغیر او تبدیل د حکومتولۍ یو عادي جریان دی. د ادارې د چارو لا ښه والي په موخه تغیر او تبدیل د ادارې یو مهم اصل بلل کېږي، ځکه چې یو مسوول به په یوه برخه کې اغېزناک تمامېږي او بل به په بله برخه کې.»
هدایت الله بدري د تېر کال په مارچ کې د افغانستان بانک د سرپرست تر ټاکل کېدو مخکې په لنډمهاله توګه د مالیې وزات سرپرست و او اوس د کانونو او پټرولیم وزارت سرپرست په توګه وګومارل شو.
خو شهاب الدین دلاور د ۲۰۲۱ کال له نومبر راهیسې د کانونو او پيټرولیم وزارت د سرپرست په توګه دنده ترسره کوله. دلاور تر سرپرستۍ لاندې د کانونو د استخراج برخه کې له کورنیو او بهرنیو شرکتونو سره ګڼ تړونونه لاسلیک شوي.
د سیاسي چارو کارپوهان وایي، په ادارو کې بدلونونه د حکومتولۍ اصل دی؛ خو زياتوي چې دغه ګومارنې باید د تخصص او مسلکيتوب پر اساس او د وضعیت له ښه والي سره مرسته وکړي.
د سیاسي چارو کارپوه ادریس محمدي ځاځی وايي: « ادلون بدلون په یوه اداره کې اصل او اصول دي او دا ترسره کېږي؛ خو ژمنتیا او تخصص په پام کې نیول لومړني ګامونه دي او که دا یو هم خطا شي نو زما په نظر ادلون بدلون بیا منفي اغېز لري. ژمنتیا او تخصص د یوې ګومارنې لپاره ډېر اړین دي.»
له دې وړاندې د اسلامي امارت رهبر د غبرګولي په اته نېټه د یوه فرمان له مخې، د عامې روغتيا او د کورنیو چارو په وزارتونو او دغه راز د فاریاب، سمنګان، کندهار او هلمند د والیانو په کچه ګومارنې کړې وې.
په یادو ګومارنو کې د قلندر عباد په لرې کولو سره د کورنیو چارو وزارت مخکېنی اداري معین نور جلال جلالي د عامي روغتیا وزارت سرپرست په توګه ګومارل شوی و.
