د جون ۲۴مه په نړيواله کچه “په سیاست کې د ښځو له نړیوالې ورځې” سره برابره ده.
له دې نړیوالې ورځې یوه ورځ وروسته د ملګرو ملتونو د ښځو برخه په سیاست کې جنسیتي مساوات او د ښځو ونډه د هېوادونو راتلونکي لپاره اړینه ګڼي.
دغې ادارې ويلي، دا مهال په نړۍ کې ۲۶ هېوادونه د ښځو له لوري رهبري کېږي او ۱۱۳ هېوادونه بیا داسې دي، چې هېڅکله یې ښځه د رهبرۍ په راس کې نه ده واقع شوې.
د ملګرو ملتونو د ښځو برخه وايي « دغه پوسټر هغه نړیوال مالومات په ډاګه کوي، چې څومره ښځې په اجرائیوي پوسټونو کې د دولتونو د رئیسانو، د حکومت د مشرانو او د کابینې غړو په توګه د وزارتونو مشري کوي. دغه مالومات ښیي، چې ښځې په نړیواله کچه د اجرائیوي تصمیم نیونې په ټولو برخو کې کمې استازیتوب کوي او په سیاسي ژوند کې د جنسیت برابرۍ مساله یو لرې هدف ګڼل کېږي.»
د افغانستان لپاره د اروپايي ټولنې شارژدافیرې رافایلا ایودیس په سیاسي لحاظ د افغان ښځو د مقاومت، هڅونې او هیلو ستاینه کړې او له سیاسي اړخه د دوی د تصمیم نیونې پر پیکه ونډې نیوکه کړې.
هغې ویلي، افغانې ښځې د خپل هېواد د جوړولو کلک هوډ لري او په وینا یې په ګډه کولی شي راتلونکو نسلونو ته په دې برخه کې د ودې زمینه برابره کړي.
ایودیس زیاته کړې: « افغان ښځې سیاست کې نه یوازې دا چې خنډونه له منځه وړي، بلکې ترڅنګ یې پلونه هم جوړوي او دا د ټولو هغو ښځو لپاره ده، چې د افغانستان راتلونکې جوړوي. ستاسو مقاومت، هڅونه او هیلې فوق العاده دي.»
د دې ترڅنګ د ملګرو ملتونو د ښځو برخې اجرائیه مشرې په نړیواله کچه د ښځو پر پیکه رول نیوکه کړې.
د ملګرو ملتونو د ښځو برخې اجرائیه مشره سیما باهوس د هېوادونو د بریالیتوب راز په سیاسي ډګر کې ښځو ته د ونډې ورکړې پورې تړلې بولي؛ خو ویلي دي چې دې موخې ته د رسېدا لپاره اوږده لار ترمخ لري.
باهوس زیاتوي: « کله چې د تصمیم نیونې په ټولو برخو کې د ښځو غږ په مساویانه ډول واورېدل شي، ټول به بریالي شي. دا په سیاست کې د ښځو پر اړینې ونډې د منلو او په دې د پوهېدلو ستره ورځ ده، چې په دې برخه کې لاهم اوږده لار په مخکې لرو.»
په “سیاست کې د ښځو نړیواله ورځ” داسې مهال په نړيواله کچه نمانځل کېږي، چې له نږدې درېیو کلونو راهیسې، افغان نجونې په کور دننه ثانوي او لوړو زدکړو ته له لاسرسي محرومې دي.
بل پلو سرپرست حکومت وايي، په بشپړ ډول یې د ښځو پر زدکړو بندیز نه دی لګولی او دغه چاره یې تر امر ثاني پورې محدوده کړې.
