په ننګرهار ولایت کې د ځانګړو امنیتي ځواکونو له لوري د انسان تښتوونکو له منګولو یو صراف ازاد او خپلې کورنۍ ته وسپارل شو.
د حاجي لونګ په نوم دغه صراف چې شاوخوا دوه اوونۍ وړاندې د جلال اباد ښار د پنځمې ناحیې اړوند، اوومه ویاله کې د انسان تښتوونکو له لوري تښتول شوی وه، د ځانګړو ځواکونو له هڅو قدرداني کوي او د امنیت د ټینګښت په برخه کې د لا زیاتو هڅو غوښتنه کوي.
لونګ زیاتوي: « د ماښام لمونځ مې په جومات کې وکړ، له جوماته چې راووتم د کور خوا تلم، په لاره کې یو څو کسان ولاړ وو، ټوډي موټر ورسره و او بس وې نیولم، موټر ته یې پورته کړم او سترګې یې راته وتړلې، له دې وروسته نو زه نور په هېڅ نه یم پوه شوی چې کومې خوا یې یوړلم.»
سوداګر مصطفی رحیمي وايي: « زموږ غوښتنه دا ده چې عدلي او قضايي ارګانونو ته دې هدایت ورکړل شي چې غله او اختطاف کوونکي باید خوشې نه شي.»
په ورته مهال د ننګرهار مسوولین وايي، د انسان تښتوونکو له منګولو د دغه صراف د خوشې کولو پرمهال د ځانګړو عملیاتو په لړ کې د یوې مېرمنې په ګډون د انسان تښتوونکو اووه کسیزه ډله نیول شوې چې له لومړنیو څېړنو وروسته به عدلي او قضايي ارګانونو ته ور وپېژندل شي.
د ننګرهار د امنیې قوماندانۍ ویاند عبدالبصیر زابلی وايي: « نن د افغانستان اسلامي امارت د ننګرهار امنیې قوماندانۍ، د استخباراتو ریاست او ټولو امنیتي او کشفي ارګانونو په خپلوهڅو وکولی شول چې حاجي لونګ د انسان تښتونکو له منګلو ازاد کړي.»
د ننګرهار د والي مرستیال مولوي سعید احمد بنوری وايي: « چې هره پېښه شوې، هر مجرم جرم ترسره کړی دی، د اسلامي امارت مسوولینو ورته ځان رسولی، مجرم یې نیولی او د جرم په سزا یې رسولی دی چې تر دې غټه بله د خوښۍ خبره نشته.»
دا په داسې حالې کې ده، چې څلور ورځې وړاندې د اسلامي امارت ځانګړو ځواکونو د بلخ ولایت په مرکز مزار شریف ښار کې هم هغه ماشوم د انسان تښتوونکو له منګولو ازاد او خپلې کورنۍ ته یې وسپاره چې انسان تښتوونکو ترې د ۳۰۰ زره امریکايي ډالروغوښتنه کړې وه.
