د صنعت او سوداګرۍ وزارت سرپرست نور الدین عزیزي له شمشاد سره په مرکه ویلي،، له ۸۰ هېوادونو سره د افغانستان سوداګریزې اړیکې پيل او پراخ شوې چې هند، پاکستان او چین په کې د عمده شريکانو په توګه مطرح دي او دغه راز د منځنۍ اسيا له هېوادونو سربېره، روسيې سره هم د سوداګرۍ د ګراف لوړولو لپاره کوټلي ګامونه پورته شوي.
عزیزي وایي، افغانستان پر صنعتي هېواد د بدلېدو وړتیا لري او دمګړۍ په هېواد کې د کورنۍ او بهرنۍ پانګونې لپاره ښه زمینه برابره شوې.
عزیزي روسیې ته خپل وروستی سفر چې د اسلامي نړۍ په څوارلسمې نړيوالې مجمع کې يې د ګډون لپاره کړی و، له لاسته راوړنو ډک بولي او زياتوي چې د ياد سفر په لړ کې يې د روسيې پنځو شرکتونه په نږدې راتلونکي کې د کرنې، کانونو او نفتو استخراج په ګډون بېلابېلو برخو کې پانګونې ته چمتو کړي.
عزیزي وايي: « هغوی دې ته لېوالتیا وښوده چې روسي شرکتونه په افغانستان د کانونو، کرنې او ځېني نورو برخو کې پانګونه وکړي. نږدې پنځو شرکتونو سره موږ په مستقیم ډول خبرې اترې وکړې چې له دې ډلې یو شرکت د کرنې په برخه کې غواړي پانګونه وکړي، کاماز شرکت چې تر دې وړاندې هم په افغانستان کې اوږده تاریخچه لري او پانګونه یې کوله اوس هم غواړي دلته پانګونه وکړي، همداراز د افغانستان د نفتو او تېلو د استخراج په برخه کې غواړي ځېنې برنامې ولري.»
عزیزي زیاتوي، د افغان سوداګرو د ویزې ستونزې یې تر ډېره حل کړي او په تېرو نږدې درېيو کلونو کې د صادارتو اندازه هم دوه برابره زیاته شوې.
نوموړی د نیوکې په توګه وایي، نړيوالو پر خصوصي سکټور محدویتونه لګولي او له امله یې یاد سکټور سخت زیانمن شوی.
عزيزي غوښتنه کوي، چې د سوداګرۍ پراختيا لپاره دې ياد بندیزونه لرې او له افغانستان سره دې همکاري زیاته شي.
هغه زیاته کړې: « دا حقیقت دی چې پر موږ محدویتونه ډېر دي او زموږ خصوصي سکټورونه له سختو بانکي محدودیتونو سره مخ دي.»
نورالدین عزیزي د حکومت د رسمیت پېژندنې په اړه د يوې پوښتې په ځواب کې وایي، سرپرست حکومت د رسمیت پېژندنې ټول شرایط پوره کړي او له نړیوالې ټولنې غواړي چې حکومت پر رسمیت وپېژني او پرې د فشار راوړلو روش بدل کړي.
عزیزي زیاتوي: « الحمدالله په ټولو برخو کې د افغانستان حکومت یو واقعي حکومت دی، د خلکو حکومت دی، د الهي عدل حکومت دی او موږ د اسلامي امارت د رهبر او نورو مسوولینو له لوري چمتو یو او نورې پرېکړې خپلې هغوی ته پرېږدو چې هغوی څه کوي. زما هیله دا ده چې د دې پر ځای چې سلیقوي چلن وکړي باید ټوله نړۍ د افغانستان د ملت لاسنیوی وکړي او د افغانستان له خصوصي سکټور سره مرستې وکړي، موږ او تاسې یو بل ته لاس ورکړو او افغانستان له دغه انزوا او دې وضعیته راوباسو.»
د صنعت او سوداګرۍ وزارت سرپرست د مرکې په یوې برخه کې وایي، پاکستان د افغانستان باروړونکو لاريو ته د تګ راتګ يو کلن اسناد ورکړي او په دې توګه ياد هېواد ته ازادانه انتقالات کولی شي.
نوموړی له پاکستان غواړي، چې سیاسي مسایل له سوداګرۍ سره ونه تړي چې له امله یې د دواړو هېوادونو سوداګرۍ ته ستر زیان اوړي.
