د ملګرو ملتونو د ماشومانو ملاتړ صندوق(یونېسف) په یوه خپاره کړي راپور کې ویلي، په افغانستان کې د وروستيو سېلابونو له کبله د لسګونه زره ماشومانو ژوند له ننګونو سره مخ دی.
یاد صندوق دې وضعيت ته په کتو له هېوادونوغوښتي چې په افغانستان کې د راتلونکو ګواښونو پر وړاندې د چمتووالي لپاره بودیجه ځانګړې کړي.
راپور کې ویل شوي، د دغو اقداماتو له پلي کېدو سره یو ځای بايد د افغانستان ټولنه له اقلیمي شرایطو سره تطابق وکړي.
د راپور یوه برخه: « په افغانستان کې د وروستیو سېلابونو له امله لسګونه زره ماشومان له خطر سره مخامخ دي. موږ له هېوادونو غواړو چې په افغانستان کې د راتلونکو ګواښونو پر وړاندې د چمتووالي لپاره بودیجه ځانګړې کړي.»
په ورته وخت کې د ماشومانو د پالنې یو شمېر بنسټونه د یونېسف ورستي راپور ته په پام سره وایي، چې په هېواد کې تل د بېلابېلو لاملونو له کبله ماشومانو زیان لېدلی دی.
دوی له سرپرست حکومته غوښتنه کوي چې د ماشومانو ژوند او د هغوی پر وړاندې ننګونې له پامه ونه غورځوي.
د افغانستان یتم پالنې موسسې مشر صدیقالله ساپی وايي: « په ټوله کې زموږ په هېواد کې د بېلابېلو پېښو او بدلونونو له امله زموږ ډېره زیانمنه طبقه ماشومان دي. ماشومان په هر ناورین کې که هغه د کډوالو راتګ دی یا په طبعي پېښو کې چې زموږ هېوادوالو ته کوم زیانونه رسېدلي دي، کورونه یې ویجاړ شوې دي نو د نورو په پرتله په دې هر څه کې ماشومان ډېر زیانمن کېږي، د دوی له روغتیا شروع تر خوراک او زده کړو پورې دوی په دې ناورینونو کې له هر څه بې برخې کېږي او څنګه چې په کار ده هغسې توجو نه ورته کېږي. د ملي او نړیوالو ټولو هغو سازمانونو څخه زموږ هیله او غوښتنه دا ه چې زموږ په هېواد کې هغه طبقه چې ډېرې توجو او پاملرنې ته اړتیا لري، هغوی ته ځانګړې پاملرنه وکړي په ځانګړې توګه هغه بنسټونه چې په کوردننه په دې چارو بوخت دي او همداراز حکومت چې ډېر ستر مسوولیت یې جوړېږي چې د ماشومانو حالت ته ډېره پاملرنه وکړي.»
وموغوښتل چې په دې اړه د حکومت اړونده ادارو د چارواکو نظرهم واخلو؛ خو هغوی زموږ پرلهپسې اړيکو ته ځواب ونه وایه.
دا په داسې حال کې ده چې د تېرې مياشتې په اوږدو کې په ځېنو ولايتونو کې سېلابونو زرګونه کسان زيانمن کړل چې ډېره برخه يې ښځې او ماشومان وو.
