په پاکستان کې ځېنو برېدونو کې د چينايي وګړي په نښه کېدو وروسته، د دې هېواد ډيپلوماټان له ممکنه وسيلې په استفادې دغلته د خپلو وګړو او پروژو د خونديتوب هڅه کوي.
سوت چينا مارنينګ پوسټ چینایي ورځپاڼې په اسلام اباد کې د دوو سرچینو له قوله راپور ورکړی، چې چین د افغاستان پر سرپرست حکومت د فشار راوړلو هڅه کوي، څو په دې توګه د تحريک طالبان پاکستان ډلې د هغو برېدونو مخنيوی وکړي، چې په پاکستان کې د چينايي وګړو او پروژو په نښه کېدو احتمال په کې شته دی.
راپور کې ویل شوي، چين په پاکستان کې د خپلو وګړو او پروژو د خونديتوب دغه طریقه وروسته له هغې اختيار کړه، چې پر چينايي وګړو له خونړيو څو برېدونو وروسته، پاکستان په خپله خاوره کې د ملکي چينايانو د امنيت په خونديتوب کې پاتې راغی.
د راپور یوه برخه:« چین د بدیلو لارو د پیداکولو په هڅه کې دی، څو د وسلهوالو له برېدونو چینايي وګړي او د دغه هېواد پروژې په پاکستان کې خوندي کړي او دا هغه څه دي، چې د پاکستان حکومت یې په تامین کې پاتې راغلی او چینايي ډیپلوماټان به په دې برخه کې پر طالبانو فشار راوړي، څو پر چینايي وګړو د ټي.ټي.پي د برېدونو مخنیوی وکړي.»
له دې سره د سرپرست حکومت چارواکي وایي، په پاکستان کې د چینايي وګړیو خوندیتوب د دغه هېواد د حکومت مسوولیت دی.
دوی زیاتوي، د چین په ګډون ټولو هېوادونو ته یې ډاډ ورکړی، چې د افغانستان خاوره به د هېڅ هېواد پر وړاندې نه کارول کېږي.
د اسلامي امارت ویاند ذبیح الله مجاهد وايي:« دغه پېښه چې په پاکستان کې شوې له افغانستان پورې هېڅ تړاو نه لري. پاکستان مسوولیت لري، چې په دې اړه خپلې پلټنې وکړي او خپله ځواب ووایي، ځکه دا سیمه د پاکستان حکومت تر کنټرول لاندې سیمه ده، دا د افغانستان موضوع نه ده، د پاکستان خپله موضوع ده، له دې که څوک استفاده کوي، د افغانستان او چین ترمنځ د اړیکو خرابېدو، په دې نه موافق کېږو، له چینايي چارواکو سره مو په دې اړه ډاډ حاصل کړی دی، هغوی ته قناعت ورکړل شوی، چې دا موضوع افغانستان پورې تړاو نه لري.»
بل خوا د سیاسي چارو یو شمېر کارپوهان وايي، په سیمه کې ترهګري او پرچینايي وګړیو برېدونه د پاکستان پالیسي ده، چې موخه يې پر نړيواله کچه د افغانستان په اړه د ذهنیت خرابول دي.
د سیاسي چارو کارپوه حکمت الله حکمت وايي:« پر چینایانو باندې برېدونه د پاکستان د استخباراتو کار دی، دوه موخې لري، لومړی پر افغانستان باندې فشار راوړل، افغانستان بدنامه کول، نړیوالې انزوا ته بیول او د هند پر وړاندې د نړیوال ذهنیت خرابول چې ګویا د چین پر وړاندې د پاکستان خاوره کې مبارزه کوي.»
ځېنې نور بیا له سرپرست حکومت غواړي، چې د ګاونډيو، سیمې او نړۍ د شومو اهدافو له منځه وړلو لپاره منسجمه او قوي پالیسي مخته یوسي، څو افغانستان له راتلونکو بحرانونو په امن کې وي.
دا په داسې حال کې ده، چې پاکستاني چارواکو څو ځله ادعا کړې چې په پاکستان کې برېدونه د افغانستان له خاورې په استفادې ترسره کېږي.
