وروسته له هغه چې ایران او پاکستان په یوې ګډې خپره کړې خبرپاڼه کې په افغانستان کې د وسله والو ډلو شتون د سیمې او نړۍ امنیت لپاره جدي ګواښ بللی وو، تازه د ملي دفاع وزارت د یوې خبرپاڼې په خپرولو سره ویلي، د دغه ورازت سرپرست مولوي محمد یعقوب مجاهد د مالیزیا له یوه جګپوړي پلاوي سره په کتنې کې ویلي، افغانستان امن او هېڅ راز ډله دلته فزیکي حضور نه لري.
مولوي یعقوب مجاهد له یاد مالیزیایي پلاوي سره کتنه چې د بهرنیو، کورنیو چارو او دفاع وزارتونونو استازي په کې دي، په سیاسي، امنیتي او ډيپلوماټیکو اړیکو خبرې کړي.
د ملي دفاع سرپرست وزیر کتنه کې ویلي، په هېواد کې د داعش ډلې په ګډون هېڅ ډله فزیکې حضور نه لري او هېڅ چاته اجازه نه ورکوي چې له افغان خاورې سیمې او نړۍ ته ګواښ پېښ کړي.
مجاهد زیاته کړې:« په ټول هېواد کې سرتاسري امنیت رامنځ ته شوی. په افغانستان کې د داعش په شمول هېڅ یوه ډله په فزیکي ډول وجود نه لري او اسلامي امارت به هېڅ چاته اجازه ورنه کړي چې د افغانستان له خاورې ګاونډیو او سیمې هېوادونو ته ګواښ رامنځ ته کړي.»
بل خوا د کورنیو چارو وزارت ویاند عبدالمتین قانع شمشاد ته ویلي، سراج الدین حقاني له مالیزیا راغلي پلاوي سره کتنه کې له نشه یي توکو سره پر مبارزې، د پولیسو روزنې او پر دوه اړخیزو همکاریو خبرې کړي.
حقاني کتنه کې زیاته کړې، افغانستان له ټولې نړۍ او په ځانګړې توګه له اسلامي نړۍ سره نږدې اړیکې او تعامل غواړي.
ورته مهال مالیزیا کې له افغان کډوالو سره د مالیزیا د خلکو او دولت د ښه چلن او له افغانستان سره د دغه هېواد د اوږدمهاله اړیکو د ستاينې ترڅنګ د دوام غوښتنه شوې.
د پوځي او سیاسي چارو کارپوهان دا ډول لیدنې د افغانستان او مالیزیا پر ګټه بولي او وایي، افغانستان د تېرو څو لسېزو جګړو له امله ځپل شوی او پاکستان تورنوي چې داعش او نورو وسله والو ډلو ته یې په خپله خاوره کې ځای ورکړی.
دوی دغه راز یاتوي، پاکستان له دې لارې هڅه کوي چې خپل لړزانده اقتصاد ورغوي او نړۍ باید پوه شي چې وسله والې ډلې په پاکستان کې مېشتي دي او د مخنیوي لپاره دې هڅې وکړي.
د سیاسي چارو کارپوه سرور نیازی وايي:« افغانستان کې د بل هر وخت پرتله د داعش پر وړاندې جدي مبارزه روانه ده او داعش یوه لوېشت خاوره هم افغانستان کې په لاس کې نه لري. دغه هېوادونه تشوېش لري دا په دې مانا ده، چې دوی اصلا داعش سره له مبارزې تشوېش لري، چې ولې داعش ډله په افغانستان کې کمزورې شوه؟»
دا په داسې حال کې ده، چې وړمه ورځ د بهرنیو چارو وزارت سرپرست مولوي امیر خان متقي د افغان – قزاق نړیوال نندارتون په پرانېست غونډه کې کابل کې وویل، چې د افغانستان درې ګاونډي هېوادونه د داعش ملاتړ، روزنه او پلان جوړونه کوي او په خبره یې د داعش ډلې پټنځایونه په افغانستان کې نشته دي. که څه هم متقي د کوم هېواد نوم وانخېست، خو زیاته یې کړه، چې درې ګاونډي هېوادونه د داعش ملاتړ کوي.
