که څه هم سرپرست حکومت په ځلونو هېواد کې د داعش ډلې پر وړاندې پر جدي مبارزې ټینګار کړی او د پراخو لاسته راوړنو ادعا يې کړې؛ خو د دې هرڅه خلاف د امریکا د بهرنیو چارو وزارت ویاند مټيومیلر یو ځل بیا په افغانستان کې د داعش ډلې د حضورخبره کوي.
میلر د یوه خبري کنفرانس پر مهال ویلي، نه پرېږدي افغانستان بیاځلې د ترهګرو پر خوندي ځاله بدل شي چې وروسته بیا له هغه ځایه امریکایان او د دې هېواد ګټې په نښه کړي.
نوموړي له داعش ډلې سره د مبارزې غوښتنه کړې او دغه چاره یې د سرپرست حکومت په ګټه بللې.
میلر زیاته کړې: « زه افغانستان ته په ټول درناوي غواړم ووایم، چې موږ تل دا ویلي دا ډېره اړینه ده چې پرې نه ږدو افغانستان بیاځلې د هغو ترهګرو په خوندي ځاله بدل شي، چې امریکایانو ته زیان اړوي، زیان اړولی شي او یا هم ښايي زیان واړوي. موږ د ترهګرو مسوول ګرځولو په برخه کې خپلې ژمنې او تعهدات ښودلي؛ خو موږ طالبانو ته دا هم په ډاګه کړې چې دا د دوی په ګټه ده، چې د افغانستان دننه د ترهګریزو ډلو پر وړاندې مبارزه وکړي.»
په ورته مهال د امریکا د کانګرس جمهوريپال غړي لېنډسي ګراهام هم په افغانستان کې د داعش د هدف ګرځولو غوښتنه کړې.
نوموړي پر خپله اېکس پاڼه له امریکايي چارواکوغوښتي چې دغه کار په بېړه ترسره کړي او په وینا یې مخکې تر دې چې ناوخته شي باید د دې ډلې پر ضد ګامونه پورته شي.
ګراهام وايي: « موږ باید په افغانستان کې د داعش خراسان څانګې اهداف په جدي ډول په نښه کړو او وړاندې تر دې چې ډېر ناوخته شي، باید د دې ډلې عملیات له خنډ سره مخ کړو. موږ مخکې تر دې چې ناوخته شي، باید دا اوس د سرحدونو عملیاتي کنټرول په لاس کې واخلو.»
خو د سرپرست حکومت ویاند ذبیح الله مجاهد بیا په افغانستان کې د داعش وسله والې ډلې د حضور او تحرکاتو موضوع په کلکه ردوي او په دې تړاو د لینډسي ګراهام او ورته نورو امریکايي سناتورانو څرګندونې د دوی عقدوي چلن او د داعش ډلې د لاسي لوی ښوولو هڅه ګڼي.
نوموړی یو ځل بیا د داعش ډلې د ځپلو په برخه کې د سرپرست حکومت پر غوڅ دریځ ټینګار کوي او وايي، داعش ډله په هېواد کې ماته شوې او پر ملکي اهدافو د دې ډلې خال خال بریدونه هم د خپلې خبرې د پخلي په مانا بولي.
مجاهد زیاتوي: « لینډسي ګراهام په امریکا کې هغه څوک دی چې مخکې یې هم د داعش پدیدې د لاسي لوی ښوولو لپاره کار کاوه او یو ډول عقدوي کس دی؛ خو د هغه خبرې مهمې نه دي، څه چې موږ وینو هغه دا دي چې افغانستان په امن کې دی او دلته داعش کومه لویه پدیده نه ده، دا ډله ځپل شوې ده او دوی اوس یوازې ملکي ساحې کله کله خپل هدف ګرځوي او دا په دې مانا ده چې دوی خپل توان له لاسه ورکړی او نه شي کولی نظامي برخه هدف وګرځوي.»
بل پلو د سیاسي چارو یو شمېر شنونکي هم د داعش پر وړاندې د سرپرست حکومت له لوري شوې مبارزه ستایي.
د سیاسي چارو شنونکی اخترمحمد راسخ وايي: « داعش په افغانستان کې د ودې او پراختیا لاره نه شي خپلولی.»
دا په داسې حال کې ده چې د امریکا بهرنیو چارو وزارت پخواني وزیر مایک پمپیو د دې هېواد پر ولسمشر جوبایډن سخته نیوکه کړې او له دې کبله یې هغه سخت ننګولی او ویلي یې دي، چې له افغانستان سره د جوبایډن ادارې ترسره شوي بېړني چلن او د امریکا د پوځي حضور پای د داعش ډلې ګواښ زیات کړی.
