په زابل کې د غواګانو ۱۷ فارمونه شتون لري، چې د رسمي شمېرو له مخي هره ورځ ۳۳۰۰ کیلو شېدې او په میاشت کې شاوخوا ۱۰۰ زره کیلو شېدې تولیدوي.
د زابل کرنې او مالدارۍ ریاست مشر مولوي عطاالله راشد وایې، د غوګاانو دا ډول فارمونه ورځ تر بلې د زیاتېدو په حال کې دي.
راشد زیاتوي: « په اوسط ډول په ورځ کې له دې ۱۷ فارمونو څخه موږ ۳۳۰۰ کیلو د شېدو محصولات لرو چې په میاشت کې نږدې ۱۰۰ زره کیلو ته رسېږي او همدلته په زابل کې د دې د پلور لبنیات شته چې نږدې ۱۱ عدده د لبنیاتو مرکزونه لرو او همدلته ترې خلک ګټه اخلي.»
ورته مهال فارم لرونکي وایې، که څه هم دولت او اړونده مرستندویه بنسټونو تر اوسه هېڅ ډول همکاري نه ده ورسره کړې؛ خو بیا یې هم په کاروبار کې ۶۰ سلنه لوړوالی راغلی.
فارم لرونکی سردار محمد وايي: « مالدارۍ ښه پرمختګ کړی او نږدې اووه کاله کېږي زه خپله په همدې فارمونو کې کار کوم، خپل فارم لرم او ښه پرمختګ یې کړی.»
یو بل فارم لرونکی حاجی احمدشاه وايي: « ما له یوې او دوو غواګانو پیل وکړ او اوس ماشاءالله فارم لرم، په همدې کاروبار کې اخته یم، شېدې تولیدوو او پلورو یې.»
فارم لرونکی ابراهیم وايي: « موږ له ایراني غواګانو سره علاقه لرو او نورې داسې غواګانې غواړو چې دلته یې موږ نسل ونیسو او په دې برخه کې دې موسسې له موږ سره مرسته او همکاري وکړي.»
زابل کې لبنیات لرونکي هټیوال هم خوښ دي چې د بهرنیو لبنياتي توکو پرځای خپل ولایت کې دننه له فارمونو څخه لبنیاتو ته په لوړ کیفیت او ټیټ قیمت لاس رسی لري.
لبنیات پلورونکی اختر محمد وايي: « الحمدالله کاروبار مو ښه دی ښه فعاله دی. مخکې بازار ته رقم رقم مستې، تروې او شیدې راتلې اوس الحمدالله دلته فارمونه لرو، سېسټم ښه فعاله او ښه تولیدات لرو.»
یو بل لبنیات پلورونکی محمد قاسم وايي: « فارم لرونکي موږ ته شېدې، مستې، کوچ، پنېر… ټول په ارزانه بیه راکوي، مخکې ټولې پوډري مستې او شېدې وې اوس خپل ښه تولیدات لرو.»
سوېلي زون کې کندهار او هلمند هم له هغو ولایتونو څخه شمېرل کېږي چې دې وروستو کې په کې د غواګانو فارمونه مخ په ډیرېدو دي.
