د بشري حقونو یو شمېر نړیوالو بنسټونو د ښځو د نړیوالې ورځې په مناسبت په یوه لیک کې له نړیوالې ټولنې غوښتي، چې په افغانستان کې د بشري حقونو خوندیتوب لپاره بېړنی اقدام وکړي.
د بښنې نړیوال سازمان، د بشري حقونو څار سازمان، فریډم هاوس او یو شمېر نورو په دې اعلامیه کې پر نړیوالې ټولنې غږ کړی چې افغانستان کې د بشري حقونو د خوندیتوب په ګډون، د فعالانو د ځورونې مخنیوی وکړي او د فشار له لارې د افغانستان سرپرست حکومت اړ کړي، چې افغان ښځو ته د ماناداره ګډون حق ورکړي.
د ګډ لیک یوه برخه: « زموږ اتحاد او سازمان په بېړني ډول غوښتنه کوي، چې نړیواله ټولنه د افغان ښځو او نجونو د بشري حقونو د ملاتړ په ګډون د افغان ښځو ملاتړکوونکي، چې په سولهيیز ډول د کمپاینونو له امله له ځورونې سره مخ دي، د خوندیتوب لپاره یې بېړنی اقدام وکړي.»
د یادو سازمانونو ګډ اتحاد په دې دوه مخیز لیک کې ادعا کړې، چې په افغانستان کې د اسلامي امارت له واک ته رسېدو وروسته دغلته د ښځو پر وړاندې محدویتونه ورځ تر بلې د زیاتېدو او سختېدو په حال کې دي او یو جدي بحران یې رامنځته کړی.
زده کړو، کار، په حکومت کې نه ونډه او پر سفر سربېره نور ګڼ محدودیتونه هغه څه دي، چې د بشري حقونو یادو ملاتړو بنسټونو یې له نړیوالې ټولنې د فشار له لارې په افغانستان کې د لرې کېدا غوښتنه کړې ده.
سرپرست حکومت که څه هم په مشخص ډول د یادو ملاتړو سازمانونو د لیک په تړاو څه نه دي ویلي، خو د بهرنیو چارو وزارت په یوه خپره کړې اعلامیه کې د ملګرو ملتونو د وروستي راپور او د یاد سازمان د سرمنشي د ځانګړې استازې د وینا په اړه په غبرګون کې مثبت ټکي ستایلي؛ خو د بې اساسه راپورنو او برخو په تړاو یې اعتراض کړی او د بې پریتوب سپارښتنه یې کړې ده.
د سیاسي چارو کارپوهان باور لري، چې په افغانستان کې د بشري حقونو خوندیوب په تړاو اندېښنې سرپرست حکومت په لوی لاس نړیوالو ته ورکړې دي او ټینګار کوي، چې حکومت دې د افغانانو او نړیوالو مشروع او قانوني غوښتنې ومني.
د سیاسي چارو کارپوه شهسوار سنګروال وايي: « په افغانستان کې چې د ښځو د حقونو په تړاو کومې اندېښڼې نړیوالو ته راپيدا دي؛ تر ډېره بریده دغه اندېښنې اسلامي امارت راولاړې کړي، اسلامي امارت ته په کار ده چې د بشر د حقونو په رڼا کې د ښځو د برخلیک، کار او زده کړو په اړه یو سپیناوی وکړي، ځکه دا نه یوازې د نړیوالو اندېښنه ده، بلکې د افغان ملت غوښتنه هم دا ده چې د دوی د اولادونو پرمخ د زده کړو دروازې خلاصې شي.»
د سیاسي چارو کارپوه عزیز معارج وايي: « په افغانستان کې د بشر حقونو او په ځانګړې توګه د ښځو او نجونو د حقونو په اړه باید نړیوال یو اقدام وکړي، یو میکانیزم او سېسټم باید جوړ کړي، چې دا پر طالبانو د فشار وسیله شي، ځکه دا دومره عادي خبره نه ده چې ویل کېږي هر څه خوندي دي، هر څه جوړ دي او هر څه ګل و ګلزار دي، دا هر څه خلک هم ویني او نړیوال هم چې نږدې درې کاله وشول نجونې ښوونځیو ته نه ځي، د کارله حقه محرومې دي، پارک څه چې ان له کوره بهر نه شي تللی او قیودات ډېر زیات شوې، همداراز ستونزې هم تر دې حده دي چې ډاکټران، ماسټران نارینه هم اوزګار دي.»
د ملګرو ملتونو د ۱۳۲۵ م پرېکړه لیک پر بنسټ ښځې په ټوله نړۍ کې د بشپړ، مساوي، مانادار او د پرېکړو په ټولو پروسو کې د خوندي ګډون حق لري.
سرپرست حکومت په افغانستان کې بشري حقونه تر بل هر وخت خوندي بللي او د نړیوالو هر ډول اندېښنې بې ځایه او مغرضانه ګڼي.
