د افغانستان ملي دفاع وزارت سرپرست ملا محمد یعقوب مجاهد او د وسله وال پوځ لوی درستیز فصیح الدین فطرت قطر ته سفر کړی.
دغو لوړپوړو افغان پوځي چارواکو لومړی د وسلو له هغه نندارتونه لېدنه وکړه چې د نظامي توکو د تولید بېلابېلو نړیوالو کمپنیو خپل تولیدات په کې نندارې ته وړاندې کړي وو.
د دغه نندارتون په څنډه کې ملا محمد یعقوب د قطر هېواد د امیر له نایب سره هم لېدنه درلوده چې په کې د افغانستان او قطر ترمنځ د شته اړیکو په لا پراختیا ټینګار شوی دی.
په ورته وخت کې ملي دفاع وزارت سرپرست لوی درستیز د قطر له دفاع وزیر سره هم ناسته کړې چې اسلامي امارت دغه ناسته ګټوره یادوي.
د اسلامي امارت ویاند ذبیح الله مجاهد وايي، قطر ته د دغو لوړپوړو افغان چارواکو سفر له نظامي پلوه د افغانستان لپاره له لاسته راوړنو ډک و.
مجاهد زیاتوي: « د هېواد دفاع وزیر د قطر له نایب امیر سره لیده کاته وکړل همداراز د هېواد لوی درستیز او دفاع وزیر د قطر له دفاع وزیر سره هم لیدنه وکړه، چې په دغو ټولو ناستو کې د افغانستان او قطر ترمنځ د اړیکو پر موضوع خبرې وشوې، د اړیکو هغه بهیرونه وستایل شول چې په تېر کې مو له قطر هېواد سره درلودل او لودیځ سره هم د اړیکو پر پراختیا خبرې او بحثونه وشول. دغه سفر له لاسته راوړنو ډک او مهم سفر و او په نظامي برخه کې به د افغانستان لپاره ډېر څه له ځانه سره ولري.»
د سیاسي چارو کارپوهان بیا قطر ته د افغان لوړپوړو نظامیانو سفر له سیاسي پلوه د افغانستان لپاره مهم یادوي.
دوی وايي، دغه سفر کولی شي چې د افغانستان، قطر او نړۍ ترمنځ همغږي او همکاري رامنځته کړي او له دې سره به د نړیوالې ټولنې او افغان حکومت ترمنځ د شته ستونزو د حل لپاره د خبرو زمینه برابره شي.
په ټوله کې باور دا دی چې قطر په سیمه کې د امریکا ستراتیژیک ملګری دی او د دغه هېواد له چارواکو سره ناستې کولی شي د افغانستان د نظام او نړۍ ترمنځ فاصلې رالنډې کړي.
د پوهنتون استاد فیض محمد ځلاند وايي: « د قطر دفاع وزیر او لوړ پوړو چارواکو سره لیده کاته نه یوازې په اوس وخت کې د افغانستان او نړۍ ترمنځ د همغږۍ او همکارۍ د رامنځته کولو لپاره یوه ښه پلمه کېدلی شي، بلکې هغه ستونزې چې په دا وروستیو کې د نړۍ او په ځانګړې توګه د غرب ترمنځ رامنځته شوې وې، د دغو ستونزو د له منځه وړلو لپاره د حل لارو د خبرواترو لپاره هم زمینه برابرولی شي.»
په دغه نندارتون کې چې د بېلابېلو هېوادونو د وسلو د تولید کمپنیو خپل پوځي پرمختللي تولیدات نندارې ته وړاندې کړي وو، د ګڼ شمېر هېوادونو دفاع وزیرانو او د پوځ مشرانو په کې ګډون کړی و او د افغانستان ملي دفاع وزارت سرپرست وزیر ته هم په کې د ګډون بلنه ورکړل شوې وه.
