د کابل یو شمېر اوسېدونکي په ژمي کې له سړې هوا د خوندیتوب په موخه په چک پواینټونو کې پولیسو ته د ژمنیو امکاناتو د ورکړې غوښتنه کوي.
دوی وایي، مسوولې ادارې دې سرتېرو ته له ورښتونو د خوندیتوب په موخه ژمني جامې او د ودرېدو په ځایونو کې غرفې ورکړي.
د کابل ښار یو تن اوسېدونکی افتخار احمد وايي: « د اسلامي امارات مجاهدینو ته د ژمي کالي، بوټان، خوراکي توکي او داسې نور شیان باید ورسېږي. دوی الحمدالله په خپل کار کې ډېر زحمت او زیار ګالي او موږ ترې راضي یو.»
په چک پواینټونو کې یو شمېر ولاړ سرتېري په ژمي کې دوی ته د امکاناتو برابرېدو له امله خوښ دي، خوغوښتنه لري چې پر خپل وخت دې منظم پوشاک او خواړه ور ورسېږي.
یو تن پولیس عبداالرحمن وايي: « اقتصادي ستونزې شته ، خو الحمدالله دومره نه دي. موږ ته خونې، ترتیبات او نورې اسانتیاوې شکر برابرې دي.»
یو بل پولیس فضل الرحمن بیا وايي: « موږ۲۴ ساعته دلته په چګ پواینټ کې یو؛ نو کوم څه ته چې اړتیا لرو باید موږ ته پر وخت ورسېږي او رسېدلې هم دي او کوم څه چې کمبود دي د هغې غم باید وخوړل شي.»
د کابل امنیې قوماندانۍ ویاند خالد ځدراڼ په ښار کې ټولو امنیتي حوزو ته د ژمنيو امکاناتو د رسېدو ډاډ ورکوي او ټینګار کوي چې په دې تړاو ځانګړې کمېټه هم ګومارل شوې.
ځدراڼ زیاتوي: « البسه ټولو حوزو ته رسېدلې او پولیسو ته هم وېشل شوې ده؛ خو بیا هم د کابل امنیه قوماندانۍ یوه کمېټه لري او دوی په پولیسو ګرځي او څّه ته چې اړتیا لري هغه ورته پوره کوي او غوښتنې یې له مشرتابه سره شریکوي؛ د همدې منظمې کمېټې له لارې که دوی خپلې غوښتنې له موږ سره شریکې کړي نو په بېړني ډول رسېدنه ورته کېږي.»
بل خوا د برېټانيا بهرنيو چارو وزارت د دغه هېواد وګړو ته لارښوونه کړې چې افغانستان کې د امنیتي وضعیت د خرابوالي په موخه دې یاد هېواد ته سفر نه کوي.
عام هېوادوال په هېواد کې ټینګ شوی امنیتي وضعیت بې ساری بولي او د نړیوالو دا ډول تبلیغات ردوي.
د کابل ښار یو تن اوسېدونکی عبدالقادر وايي: « نړیوال بیا بیا دا وايي چې افغانستان کې امنیتي ستونزې موجودې دي؛ نو د دوی دغو ادعاوو ته باید یو ښه ځواب وویل شي او دا داسې شونې ده چې دلته د امنیت لپاره یو ښه ثبوت موجود وي او په دې برخه کې لا زیات ښه والی راشي.»
دا په داسې حال کې ده، چې وړمه ورځ د کورنیو چارو سرپرست وزیر سراج الدین حقاني خوست ولایت کې د یوې دیني مدرسې په فراغت غونډه کې ټنیګار درلود چې د ټینګ شوي امنیت په موجودیت کې باید د بې باورۍ فضاء رامنځته کېدو مخنیوی باید وشي.
