د افغانستان لپاره د امریکا ځانګړي استازي توماس وېسټ د جاپان د سولې بنسټ (ساساکاوا) مشر اتسوشي سونامي سره د افغانستان په تړاو خبرې کړي دي.
وېسټ پر خپله اېکس پاڼه لیکلي، د دې بنسټ له مشر اتسوشي سونامي سره یې په دې خبرو کې له افغانانو سره د جاپان او د یاد بنسټ له همکارۍ او دوامدارې ښکېلتیا ستاینه کړې.
د وېسټ په وینا ،دواړو لوریو په دې کتنه کې په افغانستان کې د سولې او دوامداره معیشیت په برخه کې د ساساکاوا بنسټ پر ژمنتیا هم خبرې کړي.
هغه زیاته کړې:« خوښ یم، چې تېره ورځ مې د ساساکاوا د سولې د بنسټ له مشر ډاکتر اتسوشي سونامي سره وکتل. موږ د سولې او دوامداره معیشیت په برخه کې د دې بنسټ پر ژمنتیا خبرې وکړې. ما له افغانانو د ملاتړ لپاره د جاپان د دوامداره ښکیلتیا ستاینه وکړه.»
د سیاسي چارو یو شمېر شنونکي په تېرو۲۰ کلونو کې د بیارغونې ترڅنګ د سولې او ثبات د ټینګښت په برخه کې د جاپان رول مثبت ګڼي؛ خو ټینګار لري چې دغه هڅې باید د افغانستان په کورنیو چارو کې له لاسوهنې پرته ترسره شي.
د سیاسي چارو شنونکی سلیم پیګیر وايي: « جاپان چې د نړۍ د پرمختللي او پیاوړي اقتصاد لرونکو هېوادونو له ډلې دی؛ نو دا چې په افغانستان کې د دایمې سولې او ثبات لپاره کار وکړي؛ د افغانستان خلک به یې تود هرکلی وکړي.»
واک ته د اسلامي امارت له رسېدو وروسته د نړۍ ګڼو هېوادونو او نړۍوالو بنسټونو له اړمنو افغانانو سره په بېلابېلو برخو کې بلاعوضه مرستې کړي چې جاپان یو له هغو دی.
خو د اقتصادي چارو شنونکي که څه هم د ورته بنسټونو دغه ډول مرستې په اوسنیو شرایطو کې ګټورې ګڼي، خو ټینګار لري چې دغه مرستې باید تر ډېره په پراختیایي پروژو ولګول شي.
د اقتصادي چارو شنونکی عبدالنصیر رشتیا وايي: « زما په نظر که چېرې نړۍ له افغانستان سره مرسته او همکاري کوي؛ نو دا باید هم اقتصادي او هم بشردوستانه وي ترڅو موږ وکولی شو اقتصادي او پراختیايي پروژې پيل کړو او خلکو ته د کار زمینه برابره کړو، ترڅنګ یې حکومت هم مسوولیت لري چې ځېني پروژې عملي کړي ترڅو خلکو ته د کار زمینه برابره شي.»
دا په داسې حال کې ده چې له دې وړاندې هم د کورنیو چارو سرپرست وزیر سراج الدین حقاني د یاد بنسټ اړوند پلاوي سره په لېدنه کې هېواد ته د ورته بنسټونو راتګ مثبت ګام بللی و او هېله یې ښودلې وه چې یاد بنسټونه وکولی شي نړۍ د افغانستان د واقعبینانه انځور په وړاندې کولو کې مثبت رول ولوبوي.
