د امریکا بهرنیو چارو وزارت وايي، د افغانستان وضعیت څاري او هر هغه احتمالي ګواښ چې له دې هېواد څخه امریکا ته متوجه وي، سملاسي به يې له منځه یوسي.
د یاد وزارت ویاند مېتو مېلر وايي، که څه هم په افغانستان کې امریکا حضور نه لري، خو د ۲۰۲۲م کال په جولای کې د القاعده شبکې مشر ایمن الظواهري وژل کېدو ته په پام به واشنګټن د امریکا خوندیتوب او هر ډول ګواښ مخنیوي ته دوام ورکړي.
هغه زیاته کړې:« که څه هم موږ په افغانستان کې حضور نه لرو، خو د ۲۰۲۲ م کال په جولای کې د القالدې پر مشر برید ته په پام به موږ د امریکایانو خوندیتوب ته دوام ورکوو. طالبانو له موږ سره د ترهګرۍ پر وړاندې د مبارزې ژمنې کړي او موږ هېله لرو، چې دوی دا برخه تعقیب کړي. موږ د وضعیت څارنې او د تروریستي فعالیتونو پر وړاندې د ځواب ویلو لپاره خپلې وړتیاوې پر خپل ځای ساتو.»
د اسلامي امارت ویاند ذبیح الله مجاهد واييي، په افغانستان کې د القاعده په شمول هېڅ ډله فزيکي حضور نه لري او په خبره یې هېچا ته به د دې اجازه ورنه کړي، چې د افغانستان خاوره د بل هېواد پر ضد وکاروي.
مجاهد زیاتوي:« د القاعدې ډلې اوس په افغانستان کې هېڅوک نه شته دي او په دې اړه تشویشونه بې ځایه دي. بله دا ده چې د افغانستان اسلامي امارت هېچاته د دې اجازه نه ورکوي چې د افغانستان خاوره د چا پر وړاندې باندې وکاروي. په دې اړه باید هېڅوک هم تشویش ونه کړي.»
بلخوا د سیاسي چارو کارپوهان وايي، امریکا غواړي په یو ډول نړۍ ته دا وښيي چې پر افغانستان لاهم خپل نفوذ او څار لري او په دې توګه خپله افغانانو او نړۍ ته یو ډول اندېښنې پیدا کوي.
د سیاسي چارو کارپوه ادریس محمدي ځاځی وايي:« درې بعده دي لومړی بعد دا دی چې دوی( امریکا) غواړي نړیوالو ته وښيي چې اوس هم پر افغانستان باندې څه ناڅه حاکمیت لري. دویم دوی (امریکا) غواړي چې په داخل کې د حکومت او ملت ذهنیتونه مشوش کړي او درېیم دا چې دوی غواړي چې په نړیوال ستیج کې هم ذهنیتونه مشوش کړي. له ګاونډیانو سره افغانستان تر پوښتنې لاندې راولي.»
له دې وړاندې سرپرست حکومت د امریکا په ګډون د ګڼو هېوادونو هغه ادعاوې بې بنسټه بللې وې، چې په افغانستان کې يې د ترهګرۍ موجودیت او نړۍ ته یې د احتمالي ګواښونو په تړاو درلودې.
