په کندهار ولایت کې د برک افغانستان په نوم د یوې مرستندویه موسیسي په مالي ملاتړ او د کډوالو او بېرته راستنېدونکو چارو ریاست په همکارۍ ۲۰۰ راستانه شویو افغان کډوالو ته د کندهار صنعتي پارک یو شمېر کارخونې وښودل شوې.
مسوولین وايي، له دغه کاره موخه بېرته راستانه شویو افغان کډوالو ته په هېواد کې د کار فرصتونو ښودل، د هغوی تر منځ د نظرونو تبادله او یووالي ته تشویق کول دي.
د کندهار کډوالو او راستنېدونکو چارو ریاست د کډوالو میشتېدنې امر مولوي نعمت الله الفت وايي: « د ښار په ګډون له میوند او پنجوايي څخه نږدې ۲۰۰ کسان موږ صنعتي فابریکې ته راوستي دي، دلته مو کارخونې وروښودې او د دوی له کاروبار سره سم مو عامه پوهاوی ورکړ.»
د یوې کارخونې مسوول شعیب درانی وايي: « د ټولنې د یووالي او یو موټي کولو په موخه مو دلته سره راټول کړي دي، د دې پرګرام په پای کې به دوی له یو بل سره اشنا شي، د خپلو ستونزو په اړه به یو له بل سره تبادل د نظر وکړي.»
په ورته وخت کې یو شمېر بېرته راستانه شوي افغان کډوال هم دغه ډول پروګرامونه د ځان لپاره ډېر ګټور بولي او وايي، دوی کولی شي له دې لارې په هېواد کې له کاري فرصتونو سره بلدتیا پیدا کړي.
له پاکستانه یو تن راستون شوی افغان کډوال وايي:« موږ ته د کاروبار په خاطر دا پرګرام ډېر ګټور دی، د هغه ځای ماحول جلا و او د دې ځای جلا. دلته چې دا کارخونې موږ وګورو نو کوم کسبونه مو چې هلته زده کړي، دلته به ترې کار واخلو.»
له پاکستانخ راستون شوی یو بل افغان کډوال وايي: « موږ دلته راغلي یو چې دا فابریکه وګورو، دلته څه جوړېږي، موږ څه کار په کې وکړو. له دې وروسته به موږ هم خپل کار ته په کې دوام ورکړو.»
د کندهار کډوالو او بېرته راستنېدنکو چارو ریاست د مالوماتو له مخې، په تیرو شپږو میاشتو کې د سپین بولدک له لارې تر ۲۹ زرو زیاتې کورنۍ بېرته هېواد ته راستنې شوي دي.
