د بهرنیو چارو وزارت هغه راپورونه رد کړل چې ګواکې د دې وزارت سرپرست مولوي امیر خان متقي په تهران کې له پاکستاني سناتور مشهيد حسېن سره د تحريک طالبان پاکستان د سولې اړوند مذاکراتو په اړه خبرې کړي دي.
په دې اړه خپرو شوو راپورو کې ويل شوي، چې د فلسطين په اړه د اسلامي هېوادونو د استازو کنفرانس په څنډه کې مولوي اميرخان متقي او مشهيد حسېن ترمنځ د تحريک طالبان پاکستان په اړه بحث شوی دی.
په يادو راپورونو کې د متقي په حواله ويل شوي چې د تحريک طالبان پاکستان او د پاکستان حکومت د افغانستان سرپرست حکومت په منځګړيتوب هوکړې نږدې وو، خو په خبره يې د پاکستان شاتګ د دې لامل شو، چې ياد مذاکرات بې پايلې شي.
خو د افغانستان بهرنيو چارو وزارت د وياند مرستيال بيا شمشاد ته په دې اړه د متقي او مشهيد ترمنځ بحث رد کړ.
بل خوا مشهيد حسېن د پاکستان ايکپرېس ټرېبيون ورځپاڼې ته منلې چې له اميرخان متقي سره يې په يوه غير رسمي مجلس کې خبرې شوي او د تحريک طالبان پاکستان په اړه بحث يې يوه برخه وه.
خو د سیاسي چارو کارپوهان وایي، پاکستان هره سوله ييزه پروسه د خپلو ګټو په خاطر سبوتاژ کړې ده.
د سیاسي چارو کارپوه شهسوار سنګروال وايي: « دوی غواړي نړۍ، سیمې او په سر کې یې امریکا ته وښي، چې موږ د ترهګرۍ قرباني یو او په دې پلمه د ټي.ټي.پي د ځپلو په خاطر له امریکا یو څه پیسې ترلاسه کړي، بله دا چې دغه جګړه ټوله د پښتنو په سیمه کې ده، د پنجاب حکومت ته یې کوم زیان نه رسېږي؛ نو له یوې خوا به پښتانه وځپي او له بلې خوا به له امریکا امتیازات ترلاسه کړي، درېیمه خبره دا ده چې نړۍ ته به دا وښي چې ترهګر په افغانستان کې دي، نه په پاکستان کې.»
ځینې نور بیا وايي، پاکستان تل د سولې او جګړې په قضيو کې دوه مخې لوبه کوي او په دې توګه سيمه کې د زبرځواکو هېوادونو اهدافو تحقق ته کار کوي.
د پوځي چارو کارپوه اخترمحمد راسخ وايي:« د طالبانو منځګرتوب د ټي.ټي.پي او د پاکستان دولت ترمنځ کومې ویناوې چې کړي، زه په دې باوري یم چې پاکستان د تاریخ په پاڼو کې له کومې ورځې چې رامنځته شوی له خپلو ګاونډيو هېوادونو په ځانګړې توګه د افغانستان له دولتونو سره یې دوه مخې لوبه کړې او هېڅکله یې هم د سولې او امن هېله او ښه ګاونډيتوب نه دی درلودلی، د ټولو بدبختیو، جګړو او ناامنیو پيلول او سیمې ته د نړیوالو ابرقدرتونو راکشول او دلته د دوی د سیاسي موخو لپاره کار او مبارزه کول، د دوی د ستراتیژیو او موخو اساسي کرښې دي.»
دا په داسې حال کې ده، چې پاکستان د تحريک طالبان پاکستان ډلې د فعاليتونو له امله په کراتو اسلامي امارت له يادې ډلې سره پر همکارۍ تورن کړی، خو اسلامي امارت بیا د پاکستان دا ادعاوې بې اساسه او بې ارزښته بللي دي.
