د پاکستان ترهګرۍ پر وړاندې د مبارزې ادارې ادعا کړې چې له تېرو دوه نیمو کلونو راهیسې ترهګریزو پېښو کې ۹۲ تنو افغانانو لاس درلود او زیاته کړې یې ده چې سږکال په ۵۰ پېښو کې د افغانانو د لاس لرلو ثبتونه هم لري، هغه څه چې اسلامي امارت په وار وار رد کړي او بې اساسه یې بللي دي.
د اسلامي امارت ویاند ذبیح الله مجاهد د پاکستانې چارواکو وروستیو څرګندونو ته په غبرګون کې وایي، هېڅ داسې شواهد ورسره نه دي شریک شوي او وايي، په پاکستان او خیبر پښتونخواه کې وروستیو بریدونو کې هېڅ راز افغانان ښکېل نه دي.
د مجاهد په خبره، په تېر یوه کال کې یې ۴۳ پاکستاني وګړي نیولي چې غوښتل یې په افغانستان کې بریدونه وکړي.
مجاهد زیاتوي: « د افغانستان ملت او حکومت هېڅکله نه غواړي چې پاکستان کې دې ناامني او جنګ وي. کسان که نیول کېږي او د تابعیت په توګه په افغانستان پورې تړاو لري؛ نو دا خو په بېلابېلو هېوادونو کې داسې جرایم وي چې اشخاص یې په شخصي توګه ترسره کوي او حکومت او ملت په کې ملامت نه وي. د بېلګې په توګه د تېر کال په اوږدو کې موږ ۴۳ تنه داعشي وسله وال له منځه یوړل چې هغه هم پاکستاني اتباع وو؛ نو موږ خو دا نه شو ویلی چې دا د پاکستان د ولس او یا حکومت کسان دي.»
مجاهد افغانستان ته د پاکستان د جمعیت علماء اسلام ګوند مشر مولانا فضل الرحمن سفر شخصي او د دواړو هېوادونو د اړیکو د نږدېوالي په موخه بولي.
هغه زیاته کړه: «مولانا د هغه ځای د مسلمانانو او د پاکستان د علمای کرامو او مسلمانو وګړو استازیتوب کوي، په همدې خاطر موږ افغانستان ته بللی. موږ غواړو د افغانستان او پاکستان د ولسونو ترمنځ نږدېوالی په خپل حال پاتې وي او بله دا چې د علمای کرامو ترمنځ چې کوم باور شته دا په خپل ځای پاتې شي، په دې برخه کې د مولانا رول ډېر مهم دی، ځکه مو را دعوت کړ.»
د سیاسي چارو کارپوهان کابل ته د مولانا فضل الرحمن سفر د مثبتې پایلې سره مل نه بولي او ټینګار کوي، چې له هغو پاکستاني سیاستوالو دی، چې د خپل سیاسي فعالیت له پیله یې د افغانستان په مساله کې منفي رول لرلی.
د سیاسي چارو کارپوه اختر محمد راسخ وايي: « په دې سفر کې دوه موخې نغښتي دي، چې مولانا غواړي د خپل همدې سفر له ادرسه د پاکستان جنرالانو او دولتمدارانو ته وښي چې دی کولی شي د پاکستان د سیاسي او استخباراتي موخو لپاره د طالبانو ترمنځ منځګړیتوب وکړي، تر څو خپل پلانونه په عملي بڼه ترسره کړي.»
د سیاسي چارو کارپوه محمد زلمی افغانیار وايي: « نن چې کومې سیاسي ستونزې رامنځته شوې دي، اصلي موخه یې دا ده چې دوی غواړي ټولې ننګونې زموږ له لارې هوارې کړي.»
کابل ته د پاکستان د جمعیت علمای اسلام ګوند د مشر د سفر په اړه ځینې باورونه دا دي، چې د اسلامي امارت او د پاکستان ترمنځ د باور فضاء رامنځته کړي، هغه څه چې په اړه یې په رسمي ډول څه نه دي ویل شوي.
