ننګرهار ولایت کې د غازي امان الله خان ښارګوټي نیمه جوړو ودانیو او سوداګریز مارکیټونو کې چې کړکۍ او دروازې نه لري، د جګړو له امله بې ځایه شوې کورنۍ په کې له تېرو شاوخوا شپږو کلونو راهیسې مېشتې دي.
دوی چې ډېری یې د مامندرې او هسکې مېنې ولسوالۍ اوسېدونکي دي وايي، خپل کورونه یې ویجاړ او هر ژمی او اوړی یې ماشومان په بېلابېلو ناروغیو اخته او ژوند یې له کړاوونو سره مخ دی.
یو تن بې ځایه شوی وايي:« په دغو کنډرو کې پراته یو، نه کړکۍ لري، نه دروازې لري، د یخنۍ موسم را روان دی، ماشومان مو ناروغان کېږي، د لرګو وس نه لرو.»
دلته مېشت بې ځایه شوي وایي، د تېرو شپږو کلونو په موده کې ورسره بیا بیا د ویجاړو شويو کورونو د رغولو ژمنې شوي، خو تر اوسه پورې نه دي عملي شوي.
یو تن بې ځایه شوی وايي: « دلته د جنګونو له امله راغلي یو. موږ له دې کوره درې شهیدان ورکړي، درې کونډې را پر غاړه دي، د کور سرپرست زه خپله یم. بس دلته پراته یو، ماشوما ن مو اوړی او ژمی ناروغان وي.»
اخوا د کډوالو او بېرته راستنېدونکو چارو وزارت خلیل الرحمن حقاني وایي، د تازه راستنو شویو کورنیو له ځای پر ځای کولو وروسته به د داخلي بې ځایه شویو ستونزو ته بشپړه رسېدنه وکړي.
حقاني زیاتوي:« د دې لپاره موږ په راتولونکي کې قوي پلان لرو. که داخلي بې ځایه شوې دي او که له بهره راغلي دي؛ د ټولو لپاره پلان لرو؛ خو اوس مهال ګډوال راغلي نو باید لومړیتوب دوی ته ورکړل شي. زما د ارقامو له مخې، نږدې ۵۰۰ زره کسان موږ په داخل د کابل او نورو ولایتونو کې ځای پر ځای کړل.»
د مسوولینو د مالوماتو له مخې، په تېر کې د جګړو او بېلابېلو عواملو له امله ۲۳۷۰۰ کورنۍ له خپلو سیمو بې ځایه شوي چې ۶۰۰۰ یې بېرته خپلو مېنو ته ستنې شوي او پاتې نورې یې لاهم د ننګرهار په بېلابېلو سیمو کې مېشتې دي.
