د احصایې او مالوماتو ملي ادارې هېواد ته د وارداتو او دغه راز بهر ته د افغاني توکو د صادراتو په اړه تحليلي راپور خپور کړی دی.
راپور کې ویل شوي، د روان ۱۴۰۲ کال په لړم میاشت کې بهر ته د ۲۲۷.۱ میلیونه ډالرو په ارزښت صادرات شوي.
دغه راز راپور کې ویل شوي، د صادراتو ترڅنګ روان کال تر دې مهاله د وارداتو کچه هم۱۱۳۸.۱ میلیونه ډالرو ته رسیدلې ده، چې دا اندازه بيا د تېر کال له وارداتو سره په پرتلې ۴۵۶.۶ میلیونه ډالره د کموالي تفاوت په ګوته کوي.
د احصایې او مالوماتو ملي ادارې ویاند محمد حلیم رافع وايي: « د احصايي او مالوماتو ملي ادارې د ۱۴۰۲ کال د لړم د میاشتې صادراتو او وارداتو ټولیز ارقام راټول کړي او تحلیل کړي یې دي، چې د همدې ارقامو پر بنسټ سږکال د لړم په میاشت کې ۲۲۷.۱ میلیونه ډالرو په ارزښت صادرات ترسره شوې دي او د ۶۸۱.۴ میلیونه ډالرو په ارزښت واردات ترسره شوې دي. صادرات تر ډېره بریده پاکستان، هند او چین هېوادونو ته ترسره شوي او واردات له پاکستان، متحده عرب اماراتو او ایران هېوادونو څخه ترسره شوې دي.»
د صنعت او سوداګرۍ وازارت ویاند اخند زاده عبدالسلام جواد بیا وایي، د افغانستان ډېری صادراتي اقلام د ډبرو سکاره، پنبه، اينجه او تخمونه ، وچه او تازه مېوه، غالۍ، زعفراڼ او نباتي بوټي دي چې پاکستان، ایران، ترکيې او چین ته صادر شوي دي.
جواد زیاته کړه: « زموږ زیاتره صادراتي توکي، د ډبرو سکاره، پنبه، اینجه، د اېنجې توخم، وچه او تازه مېوه، کرنیز توکي، غالۍ، زعفران او نباتي بوټي دي، چې پاکستان، هند، چین، متحده عرب امارتو، ایران او ترکیې ته صادر شوې دي او وارداتي توکي د پټرولو تیل، د ډيزلو تیل، پرزه جات، ماشینونه او خوارکي توکي دي، چې زیاتره له ایران، پاکستان، چین ، متحده عرب امارتو، ترکمنستان، قزاقستان، روسیې او ترکمنستان هېوادونو څخه وارد شوې دي.»
د اقتصادي چارو کارپوهان په هېواد کې دننه د صنعتي توکو د معیاري پروسس لپاره د کارخونو، د کارګو او ریل پټلۍ جوړول او له ګاونډیو سره د ترانزیتي لارو پرسر د ستونزو حل د صادراتو په زیاتوالي کې مهم بولي.
د اقتصادي چارو کارپوه محمدنبي افغان وايي: « په داخل کې زموږ د صنعتي توکو لپاره یا د معدنیاتو د پروسس لپاره دې د پروسس معیاري کارخونې جوړې شي او دا توکي دې په خپل نوم نورې نړۍ ته صادرشي، همداشان ریل پټلۍ او کارګو فعالول او منظمې لارې له ګاونډيانو سره جوړول، ځکه موږ ډېر د ګاونډيانو په تصرف کې یو، لارې مو پر دوی دي؛ نو د دې لپاره باید یو بشپړ میکانیزم او یوه تګلاره جوړه شي.»
د احصايې او مالوماتو ملي ادارې له لوري په خپاره شوي تحليلي راپور کې ویل شوي، چې تېر کال تر ټولو زیات صادرات پاکستان، هند، ترکيې او چین ته شوي او تر ټولو زیات توکي هم له پاکستان، ایران او متحده عرب اماراتو څخه وارد شوي دي.
