د کندهار عامي روغتیا ریاست اړوند د سویلي زون د سرویلانیس یا وختي خبرتیا څانګي مسوول ډاکټر جناح ابراهیمي وايي، په تیرو ۱۰ میاشتو کې د زون په پنځو ولایتونو کندهار، زابل، اروزګان، هلمند او نیمروز کې ۴۶۳ زره کسان پر بېلابېلو موسمي ناروغیو اخته شوي چې د تیرکال دغه مودې پرتله څو برابره زیاتوالی ښيي.
د ابراهیمي په وینا دغو ناروغیو کې سینه بغل، ټوخی، زکام، کورونا، نفس تنګي او نورې تنفیسي ناروغۍ شاملې دي.
هغه زیاتوي:« په تېرو ۱۰ میاشتو کې (له جنورۍ تر اکتوبر) پورې موږ ویلی شو چې د ټول زون په پنځو ولایتونو کې شااوخوا ۴۶۳ زره کسان په بېلابېلو موسمي ناروغیو اخته شوي.»
ابراهیمي وايي، د موسمي ناروغیو د نه اخته کېدو لپاره باید واکسین ولګول یي او همداراز د حفظ الصحې د مراعت کولو تر څنګ دې له سړې هوا ځان وساتل شي.
له دې سره هم مهاله کندهار کې هم د هوا د سړیدو سره سم موسمي ناروغۍ زیاتي شوي چې تر ټول ډېر ماشومان پرې اخته کیږي.
دا مهال د دغه ولایت په میرویس حوزوي روغتون کې لسګونه په موسمي نارغیو اخته ماشومان بستر دي.
پر موسمي ناروغۍ د اخته یوه ماشوم مور شګوفه وايي:« یوه اوونۍ کېږي چې ماشوم مې تپه یې لرله، ټوخی یې کاوه… نن پنځمه ورځ ده، چې دلته روغتون ته مې راوړی دی. ډاکټرانو راته وویل، چې ماشوم د کولمو میکروب لري.»
پر موسمي ناروغۍ د اخته یوبل ماشوم مور کریمه بیا وايي:« زه له ټولو مېندو غواړم چې خپل ماشومان ښه ګرم وساتي. هوا په سړېدو ده.»
روغتیا پالان وايي، که کورنۍ د موسمي ناروغیو مخنیوي په موخه روغتیایي لارښوونې عملي نه کړي او په سړه هوا کې خپل ماشومان ګرم ونه ساتي، نو تنفسي او نورې موسمي ناروغۍ به یې ژوند وګواښي.
