د ګالوپ په نوم ټولنې له لوري د څېړنو پايله ښيي، چې د ازادۍ له مخې د افغان نجونو او ښځو رضایت تر ټولو ټېټه کچه کې دی.
د یادې ټولنې په راپور کې ویل شوي، په سلو کې یوازې ۱۱ مېرمنو، چې د جولای په میاشت کې ورسره مرکې شوي، د خپلو ازاديو په اړه رضايت ښودلی.
راپور کې ويل شوي، چې په ۲۰۲۳ کال کې په افغانستان کې دننه د ژوندانه د چارو انتخاب په هکله د افغان مېرمنو او نجونو رضایت تر ټولو ټېټې کچې کې وه او ټولې افغان مېرمني رنځېدلې او ډېرو داسې احساس کړ\ی چې درناوی يې نه کېږي.
د راپور یوه برخه:« په ۲۰۲۲ کال کې په سلو کې ۲۹ میرمنې، چې د ژوندانه په چارو کې له ازادۍ څخه خوښې او په ۲۰۲۳ کال کې تر ټولو ټیټې کچې ته ښکته کېدل په دې مانا دي، چې افغان میرمنې پوه شوي، هغه محدودویتونه او بندیزونه چې د طالبانو حکومت د میرمنو پر کار، تعلیم او نور چارو باندې لګولي، نه بدلېدونکي دي.»
د ګالوپ د څېړنو پايلې ښيي، د سرپرست حکومت په حاکمېدو سره په افغانستان کې پر نجونو او مېرمنو داسې بندیزونه لګول شوي، چې په نړیواله کچه غندل شوي.
راپور کې ویل شوي چې په ټول افغانستان کې لاهم له شپږم ټولګي پورته نجونې ښوونځیو او پوهنتونونو ته نه پرېښودل کېږي.
د راپور یوه برخه:« په افغانستان کې پر سړیو د طالبانو له خوا هغومره بندیزونه لګېدلي، لکه څومره یې چې په افغان میرمنو او نجونو لګولي. خو بیا هم افغان میرمنې او نجونې په اوس وخت کې د خپل ژوندانه د چارو انتخاب په هکله خوښې نه دي.»
خو د اسلامي امارت ویاند ذبیح الله مجاهد د ګالوپ دغه څېړنه او راپور له حقیقت لرې ګڼي او وايي، حکومت ټولو مېرمنو ته د شريعت په چوکاټ کې د حقونو ورکړې ته ژمن دی.
مجاهد زیاته کړې:« د ګالوپ په نوم چې کومه نظرپوښتنه شوې دا اعتبار نه لري. ډېری دوی انلاین نظر پوښتنه کوي، ډېری ګډونوال یې هم هغه کسان دي چې له افغانستانه بهر تښتېدلي دي. هغوی به طبعا د افغانستان له وضعیت سره حساسیت لري. دلته پرمختګونه نه شي زغملی، منفي خبرې کوي، منفي نشرات کوي، منفي نظر ورکوي. هغه موږ ته اعتبار نه لري. موږ افغانستان کې وضعیت ګورو، د تېرو ۲۰ کلونو پرتله اوس وضعیت ارامه دی. د ښځینه وو په ګډون ټول ښه ژوند لري، ارامه ژوند لري، البته ستونزې په یوه جګړه ځپلي هېواد کې په یوه ورځ نه حل کېږي، د دې لپاره مبارزه روانه ده. نظام د پخوا پرتله اوس خلکو ته ډېر خدمات وړاندې کوي.»
د ګالوپ د څېړنې خپرې شوې پايلې څرګندوي، چې یوازې ۱۷ په سلو کې افغان مېرمنې له دوی سره له درناوي ډک چلن تائيدوي په داسې حال کې، چې ۸۳ سنله نورې بيا د حکومت له لوري ورسره کېدونکی چلن ناوړه او له سپکاوي ډګ بولي.
