تورخم ښارګوټي ته څېرمه د لعلپورې ولسوالۍ په مېشت بنډغالي کې د یوه خصوصي خیریه بڼسټ پر مالي ملاتړ له پاکستانه د راستنېدونکو افغان کډوالو لپاره د ۷۰ کورونو ، یوه جومات، پاکو اوبو رسولو شبکې، کلينک او ښوونځي جوړلو بنسټ ډبره کېښودل شوه.
د قمر خیریه بنسټ استازی الماس مومند وايي، دا کورونه بې سرپنا هېوادوالو لپاره جوړیږي، چې پر هر کور ۲۲۰۰ امریکايي ډالره لګښت راځي.
مومند زیاته کړې:« دا یو بېړنی حالت دی، په یوه کور کې یوه خونه، یو تشناب، یوه اشپزخانه او ورسره یو څه چاردیوالي ده. انجنیرانو مو هم خپل دي، ټول وسایل مو خپل دي، نو پر یوه کور شااوخوا ۲۲۰۰ ډالر لګښت راځي.»
اخوا کډوال بیا وايي، خوښ دي چې لومړنیو مرستو سربېره ورته دایمي خدمات هم ترسره کیږي.
په ورته وخت کې دوی له سرپرست حکومته غواړي، چې کاري زمینې ورته برابرې کړي.
له پاکستانه راستون شوی یو تن افغان کډوال وايي:« ځای مو نشته ، کور مو نشته، سرپنا نه لرو او ژوند مو ډېر سخت دی. نو موږ له دولته دا غوښتنه کوو چې یو ځای راکړي او د کار زمینه راته برابره کړي.»
د ننګرهار ولایت کډوالو او راستنېدونکو چارو ریاست مسوولین وايي، اسلامي امارت په پلان کې لري، د ټولو هغوی کډوالو لپاره چې تازه راستانه شوي او سرپنا نه لري ورته به اړینې اسانتیاوې برابرې کړي.
د چارواکو د مالوماتو له مخې، پاکستان کې غیر قانوني کډوالو ته د ټاکل شوي ضرب الاجل له پای ته رسېد راهسې تر دې دمه د تورخم له لارې شااوخوا ۵۰ زره کورنۍ هېواد ته راستنې شوي او ډېری یې خپلو اصلي مېنو ته ګرځېدلي دي.
