د پاکستان له لوري پر زوره د افغان کډوالو اېستلو توند غبرګونونه راپارولي دي. د پاکستان پر دغې پریکړې افغان حکومت، نړیوالو بنسټونو، ملګرو ملتونو او عامو افغانانو نیوکې کړي چې ګني په دغه برخه کې اسلام اباد د کډوالۍ له ټولو نړیوالو قوانینو او اصولو سرغړونه کړې.
د سیاسي چارو کارپوهان په دې باور دي چې له افغان کډوالو سره د پاکستان زور زیاتی او ناسم چلن په اساس به د اسلام اباد پر وړاندې د کابل بهرني سیاست کرښې کاږل کیږي.
دوی وايي، د پاکستان له لوري د افغان کډوالو ځورونه او په نامناسب وخت کې یې پر زور اېستل هغه کړنه ده چې د افغانستان راتلونکي نسلونه به یې هم هېر نه کړي.
د سیاسي چارو کارپوه نجیب الله جامع وايي:« د پاکستان د تېرو دوو میاشتو چلن او کوم ظلم او وحشت یې چې کړی، افغانان یې له خپل کوره راېستي، افغانو ښځو ته یې سپکاوی کړی، چې دا هر څه به په راتلونکي کې په سیاست، حکومت، له پاکستان سره په تعامل او د پاکستان پر وړاندې د افغانستان بهرني سیاست دریځونه به همدا ټاکي؛ نو پاکستان باید سر له ننه په خپل سیاست بیا کتنه وکړي، که نه نو په دې باید پوه شي چې موږ به محاسبه ورسره لرو او دا محاسبه به د نسلونو محاسبه وي.»
د پوهنتون استاد فیض محمد ځلاند وايي، له دې کار سره پاکستان د تل لپاره د افغانستان په څير ګاونډی چې له ځان جلا کړی او دا به د اسلام باد پر زیان تمام شي.
ځلاند زیاته کړې: « د کډوالو بېرته راتګ یوه ستونزمنه پرېکړه ده، ګڼې ستونزې له ځانه سره لري؛ خو ګڼ فرصتونه هم لري او کېدای شي په اوږد مهال کې افغانانو ته یوه ګټوره پروسه تمامه شي؛ خو دا هر څه د پاکستان پر زیان دي، پاکستان له خپل یوه دوست ګاونډي هېواده جلا کېږي.»
په همدې حال کې اسلامي امارت د پاکستان له لوري پر زور د افغان کډوالو اېستل ناسم کار ګڼي، خو زیاتوي چې له کډوالو سره د پاکستان دغه ډول چلن د دواړو هېوادونو ولسونو اړیکو ته زیان رسوي.
د اسلامي امارت ویاند ذبیح الله مجاهد وايي:« له کډوالو سره زور زیاتي، د هغوی ځورول، زندان ته کشول، ماشومان، ښځې او سپین ږیري ازارول د دواړو هېوادونو اړیکو ته زیان اړوي. موږ او پاکستان وروڼه ملتونه یو او باور مو ترمنځ موجود و، پاکستان د افغانانو دویم کور و؛ نو حکومت باید داسې یو چلن نه وای اختیار کړی، دا چلن د پاکستان ولس هم نه خوښوي او افغانان یې هم نه خوښوي او د دواړو ملتونو په زیان ده.»
کارپوهان وايي، له پاکستان سره دې هر ډول تعاملات پرې کړل شي او پر بدیلو لارو چې افغانستان ورته زیات لاس رسی لري کار وشي .
د دوی په خبره، د سوداګرۍ لپاره دې د نورو هېوادونو له بنادرو کار واخېستل شي او منځنۍ اسیا ته دې د پاکستان ترانیزیت او نورو سوداګریو لارې بندې شي.
د پوهنتون استاد فیض محمد ځلاند وايي: « موږ له پاکستان سره نه بېلېدونکې اړیکې لرو، ځکه نو د یوه ګاونډي په توګه نه شو کولی خپله جغرافیه بدله کړو؛ خو کولی شو له پاکستان سره د خپلو تعاملاتو په کمرنګه کولو هغوی ته ګڼې هغه ستونزې جوړې کړو چې موږ ته یې جوړوي، د سیمې نورو هېوادونو ته د همکارۍ لاس غځولی شو او له نړۍ سره د ټرانزیټي تعاملاتو یا هم د سوداګرۍ تعاملاتو نورې لارې پیدا کولی شو، د ایران له لارې، د منځنۍ اسیا د هوا له لارې، چین سره وروستي تعاملات، دا ټول هغه څه دي چې په پاکستان د افغانستان اتکا راکمه کړي.»
دپاکستان له لوري افغان کډوالو ته وتلو نیټه د تیرې سې شنبې په ورځ پایته ورسیده چې اوس په سوړ ژمي افغان کډوالو له دغه هېواده را روان دي.
د راپورونو له مخې، پاکستان په کراچۍ ښار کې ددغه هېواد پولیسو افغانان لوټلي دي جایدادونه یې ترې اخېستي او دسرو زرو ترڅنګ نقدې پیسې یې هم ترې اخېستې دي.
