د ننګرهار ولایت قبایلو چارو ریاست د غونډو په تالار کې له سلګونه قومي مشرانو سره د هغوی ستونزو د اورېدو په تړاو ناسته ترسره شو.
په ناسته کې قومي مشرانو وویل، اسلامي امارت دې لرې پرتو سیمو ته لومړیتوب ورکړي؛ ځکه په خبره یې چې دوی هر وخت د شته نظامونو د امنیت او ساتنې لپاره کار کړی.
دوی دغه راز د حکومت له مشرتابه غوښتي چې د دوی دودیزو پرېکړو ته درناوی ولري.
قومي مشر چترال همت شینواری وايي: « دوی دې ولسونه راوغواړي، جرګې دې ورسره وکړي، د ادارې تر شا یې ودروي او اداره هم دې ته متوجې کړي، چې دا ولس دی، بې له ولسه نه کار کېږي او نه روزګار.»
قومي مشر دروېش لعلپوروال وايي: « هر یو قوم خپل نرخ لري خپله جرګه او خپل دود لري. مومند خپل دود او جرګه لري، شینواري خپل دود او جرګه، خوږیاڼي یې خپل لري. موږ چې کومه جرګه وکړو، قومي مشران، یا عالمان یا ځوانان چې جرګه وکړو نو تاسې ووايئ چې دا دوی کړې ده او باید پلي شي.»
د قومي مشرانو په خبره، چې په تېرو ۲۰ کلونو کې د بیارغونې په برخه کې له پامه غورځول شوي او له سرپرست حکومت غواړي، چې دوی ته دې په لرې پرتو سیمو کې رغنیزې او بنسټیزې پروژې پلې کړي.
قومي مشر مسلم خوږیاڼی وايي: « زموږ د کابل ننګرهار پر دویم سړک باید مشران غور وکړي، په دې به د ولسونو ډېرې ستونزې حل شي.»
قومي مشر دروېش لعلپوروال وايي: « داسې یو سړک چې د لعلپورې له دوه سرکې تېر شوی تر ګل ډاګه پورې او ۱۲ متره دی، که همدا سړک له ګل ډاګه تر چکنورو تېر شي او ګوشتې ته ورسېږي، زموږ ډېرې ستونزې به حل شي، ځکه موږ به جلال اباد ته نږدې راشو له ګوشتې ها خوا کامه او جلال اباد ته به راشو.»
د سرحدونو، قومونو او قبایلو چارو وزارت استازی د خلکو ستونزې مني او د حل ډاډ ورکوي.
د سرحدونو، قومونو او قبایلو چارو وزارت د جرګو او قبایلو معین، ملا عبدالخالق عابد وايي: « د افغانستان ولسونه په لرو پرتو، ګوشه، غرنیو سرحدونو کې پراته دي. دوی ته په دا دوو کلونو کې رسېدنه نه ده شوې او امکان یې نه و. ما مخکې تاسې ته وویل، اسلامي امارت په کنډواله کور راغلی دی. اسلامي امارت په اړینو شیانو مخکې کار کوي، د جوړونې او ابادۍ هڅې یې کوي؛ نو هرومرو به له لرو پرتو سیمو ته هم ځي او خدمات به رسوي.»
د سرحدونو، قومونو او قبایلو چارو وزارت په خبره، چې تر دې وروسته د قومونو یووالي او د شته ستونزو د هواري لپاره په لومړیتوب کې ځای لري او له ولسونو سره پر ګډه ورته رسیدنه کوي.
