د کندز ولایت امنیې قوماندانۍ مسوولین وايي، دغه ولایت کې په تېرو شااوخوا درې میاشتو کې په بېلابېلو جرمونو تورن سلګونه کسان نیول شوي چې ورسره جوخت امنیتي وضعیت ورسره ښه شوی دی.
د کندز امنیې قوماندانۍ امنیت آمر مولوي محمد رحیم ذالفقار وایي، د بد امنۍ ټغر یې ټول کړی او ټول هغه کسان چې د ښار امن او نظم به یې ګډوډ کاوه، اوس په زندانونو کې پراته دي.
د ذالفقار په خبره، ډېری نیول شوي کسان چې ښځې او ماشومان هم په کې شامل دي د خلکو په همکارۍ یې نیولي او د لا زیاتې مرستې غوښتنه کوي.
هغه زیاته کړې:« په کندز کې د جرمونو کچه ډېره ټيټه شوې ،خو دا موږ ته د قناعت وړ نه ده. زموږ هڅه دا ده چې د جرمونو کچه صفر ته راشي او صفر ته د راوستلو لپاره د ملت همکارۍ ته ډېره اړتیا ده. موږ له دوی همکاري غواړو ترڅو د ملت امنیت خوندي وي.»
سوداګر او عام خلک هم د مسوولینو هڅې ستایې او وایي، د تېر وخت پرتله د کندز او لویو لارو دا مهال امنیت ټینګ شوی دی.
یو تن سوداګر عبدالمتین یوسفزی وايي:« له مسوولینو او په ځانګړې ډول له قضايي ارګانونو مو غوښتنه دا ده، چې مجرمینو ته جزا ورکړي، داسې نه شي چې نن ونیول شي او سبا بېرته خوشې شي. هغه څوک چې جرم کوي او ثابت شي نو خپله جزا باید وویني څو د جرم کچه ټیټه شي.»
د کندز یو اوسېدونکی وايي: « مخکې په کندز کې غلاوې وې او اختطافونه وو، له امنیه قوماندانۍ غواړو چې هر کس چې ګیر شي نو باید بندي شي، اول زه شخصاً پر ما چې جرم ثابت شو باید بندي شم، داسې نه چې ونیول شي او بېرته يې خوشې کړي.»
مولوي ذالفقار پر خلکو غږ وکړ چې له امنیتي ځواکونو سره خپلې همکارۍ لا جاري وساتي او هغه کسان چې په ورانکاره کړنو کې لاس لري باید د قانون منګولو ته وسپارل شي.
ذالفقار زیاتوي: « موږ د کندز ولس ته ډاډ ورکوو چې کشفي او امنیتي ځواکونه شپه او ورځ د دوی په خدمت کې دي. زموږ چک پواینټونه او سیارې ګزمې په ښار او اطرافو کې جریان لري. موږ له دوی غواړو چې چېرته مجرمین وویني او په اصل کې مشکوک خلک وي؛ نو موږ ته پر وخت خبر راکړي څو کشفي او امنیتي ځواکونه پر وخت اقدام وکړي او مجرمین ونیسي.»
کندز کې داسې مهال امنیتي مسوولین د ډاډمن امنیت خبره کوي چې دلته به ډېرې غلاوې روږدو کسانو کولې خو د امنیې قوماندانۍ دغه ولایت له روږدو کسانو پاک کړی او دا مهال ورته منظم کمپ جوړ شوی چې سلګونه روږدي په کې تر درملنې لاندې دي.
