د اقتصاد وزارت چارواکي وايي، تر اوسه پورې په هرات ولایت کې د کنټرول ادارې لخوا شاوخوا ۵۷۰۰ زیانمن شویو کسانو ته مرستې برابرې شوي دي.
د دوی په خبره ۱۱۲ مرستندویو موسسو ورسره د مرستې ژمنه کړې او دغه مرستې به په پوره روڼتیا زیانمن شویو کسانو ته ووېشل شي.
چارواکي که څه هم يو شمېر زيانمنو کورنيو ته د مرستو د وېش خبره کوي، خو زياتوي چې تر دې دمه راټولې شوې مرستې کافي نه دي او د لا زياتو مرستو ته اړتيا ده.
د اقتصاد وزارت د انجوګانو رئیس مفتي عبدالسلام اشرفي وايي: « په عمومي توګه دغه مرستې چې د هرات له زلزله ځپلي ولس سره کېږي دا بسنه نه کوي، ځکه دا مرستې د هغه چا لپاره کېږي چې ژوندي پاتې شوي، په زنده جان ولسوالۍ کې نږدې اته کلي داسې دي چې ډېر کم کسان په کې ژوندي پاتې دي، زیاتره یې شهیدان شوې دي.»
بل خوا زیانمن شوي کسان وایي، خپل هر څه یې د زلزلې له امله له لاسه ورکړي او له حکومت او مرستندویو موسسو غواړي، چې له ژمي وړاندې ورته سرپناوې جوړې کړي.
زلزله ځپلی محمد داوود وايي: « زموږ هېله دا ده چې پاتې شوي کسان هر څه ته اړتیا لري او ورته رسېدنه وشي،هېڅ ورته نه دي پاتې، د خوراک، څښاک او د اغوستو کالي هر څه ته اړتیا لري، همداشان دا چې د هرې کورنۍ څخه کوم مال پاتې دی، دا مالونه هم سرپناه نه لري.»
په همدې حال کې د هرات عام وګړي هم د زلزلې له ویرې سړې شپې د سړکونو پر سر سبا کوي. دوی وایي د شپې لخوا هوا سړه او ماشومان یې له ګرمایشي امکاناتو بې برخې دي.
دوي له حکومت څخه غواړي، چې ورته د شپې سبا کولو لپاره خیمې او نور توکي ورکړي.
د هرات اوسېدونکی ګل احمد وايي: « ستونزې زیاتې دي، ماشومان ناروغ دي هوا سړه ده، امکانات نشته، خوراک او څښاک ته څه نشته، کورنو ته چې هم ورځو ډارېږو چې بیا زلزله و نه شي.»
چهارشنبه سهار شاوخوا پنځه نیمې بجې يو وار بيا هرات د شدیدې زلزلې شاهد و، چې خلګو ته یې درانده مالي زیانونه اړولي او شاوخوا له اتیا څخه زیات ټپیان هم د هرات حوزوي روغتون ته لیږدول شوي دي.
