د روسیې او ازبکستان ولسمشرانو د روسیې په سوچي ښار کې د لېدنې پرمهال په افغانستان کې د تلپاتې سولې او ټیکاو په موخه د خپلو هڅو د دوام خبر ورکړی دی.
په یوه ګډه خبرپاڼه کې چې د دواړه لوریو له خوا خپره شوې راغلي، روسیه او ازبکستان په افغانستان سوله او ثبات د سیمې او ګاونډ هېوادونو له امنیت سره تړلي بولي او له ملګرو ملتونو يې غوښتي چې د افغانستان اقتصادي ثبات او د افغانانو د ژوند په هوساینه کې ګډ کار ته دوام ورکړي.
د خبرپاڼې یوه برخه:« په افغانستان کې سولې او ټیکاو ته باید لومړیتوب ورکړل شي، چې ورسره په بشپړ ډول د مرکزي اسیا او ګاونډ هېوادونو امنیتي ګټې او پرمختګ هم خوندي کېږي. ملګري ملتونه باید د افغانستان په اقتصادي بیارغونه او د افغانانو د ژوند هوساینې د کچې په لوړولو کې رغنده رول ولوبوي.»
د سیاسي چارو تحلیل کوونکي وايي، افغانستان د اسیا زړه او د جغرافیايي ځانګړي موقعیت لرونکي هېواد په توګه چې منځنۍ او سویلي اسیا هېوادونه سره نښلوي، په کې هر ښه او ناوړه وضعیت په مستقیم ډول د سیمې هېوادونه اغیزمنوي چې روسیه او ازبکستان هم ترې مستثنا نه دي.
دوی وایي، هغه هېوادونه چې دې باریکۍ ته یې پام دی په دې لټه کې دي، چې څنګه او له کومو لارو په افغانستان کې د اقتصادي او سیاسي ترینګلیتا مخنیوی وکړي؟
د سیاسي چارو تحلیل کوونکی نازکمیرزیارمل وايي: « بې له شکه کله چې افغانستان بې ثباته کېږي، د افغانستان له ثبات سره د سیمې ثبات او په ځانګړې توګه د منځنۍ آسیا ثبات تړلی دی او کېدای شي چې د افغانستان بې ثباتي هغوی ته هم ګواښ اوسي.»
تحلیل کوونکي د روسیې او د ازبکستان په ګډون د سویلي اسیا له هېوادونو سره د افغانستان اړیکې نه شلېدونکي ګڼي او له دې هېوادونو غواړي چې د افغانستان ملي ګټو په نظر کې نیولو سره خپله همکاري او ښکېلتیا لازیاته کړي.
د سیاسي چارو تحلیل کوونکی شېرحسن حسن وايي: « روسیه د یوه سازمان ورکونکي هېواد په توګه په سیمه کې د یوه ممد په ډول خپل رول لري او له دغه رول څخه په ګټه اخېستنې روسیه کولی شي په سیمه کې اقتصادي او سیاسي همغږي رامنځته کړي او د دغه سیاسي همغږۍ رامنځته کولو لپاره د روسیې غږ زورور، رسا او رسېدونکی دی.»
روسیه داسې مهال په افغانستان کې د سولې اوثبات پر اړتیا ټینګار کوي، چې دغه هېواد تېره اوونۍ په کازان کې د افغانستان په تړاو د مسکو فارمټ د پنځمې ناستې کوربتوب کاوه او په لړ کې يې په افغانستان کې له ترهګرۍ او نشه یي توکو سره د مبارزې ترڅنګ په ګڼو مواردو کې، د سرپرست حکومت مبارزه وستایل شوه او له نړیوالې ټولنې څخه یې له افغان حکومت سره د همکارۍ غوښتنه وکړه.
