د ازموینې ملي ادارې د ۱۴۰۲ لمریز کال کانکور ازموینو پایلې د دوشنبې پر ورځ د (۱۴۰۲ کال د وږي پر ۱۳ مه) اعلان کړې.
د ازموینو ملي ادارې سرپرست عبدالباقي حقاني د ۱۴۰۲ کال د کانکور ازموینو پایلې اعلان مراسمو کې وویل، سږکال د کانکو په ازموينه کې شاوخوا ۸۹ زره تنو ګډون کړی وو چې له ډلې څه باندې ۸۲ زره بريالې شوي دي.
حقاني ویلي، سږ کال د کانکور په ازموينه کې د ګډون کوونکو کسانو له ډلې ۸۲ زره۶۳۰ تنه دولتي پوهنتونونو، نيمه لوړو زدهکړو او خصوصي پوهنتونونو ته بريالي شوي دي.
حقاني زیاته کړې: « موږ چې اوس کومه پایله اعلانوو دا تقریباً د پنځو برنامو پایله ده، عمومي کانکور، دیني مدارس، څوارلسم پاسان، د سویې تثبیت، عالیه او خامسه، په دې کې موږ سره په مجموع کې ټول ګډونوال ۸۸ زره ۷۴۲ کسان دي او بریالي شوي کسان ۸۲ زره ۶۳۰ کسان دي، د تېر کال په پرتله الحمدالله د بریالیو کسانو شمېر زیات دی.»
حقاني وايي، په برياليو کسانو کې ۴۴ زره ۳۳۶ تنه يې دولتي پوهنتونونو ته جذب او پاتې نور يې نيمه لوړو زده کړو او خصوصي پوهنتونو ته بريالي شوي.
هغه زیاتوي: « په تېر کال کې ۴۰ زره ۸۳۹ کسان امارتي لوړو زده کړو موسسو ته بریالي شوي وو او سږکال ۴۴زره ۳۳۶ کسان بریالي شوي، تېر کال ۲۴۲۳ کسان نیمه لوړو زده کړو موسسو ته بریالي شوي وو، سږکال ۲۷۵۵ کسان بریالي شوي. تېر کال خصوصي پوهنتونونو ته د جذب شمېر ۱۸ زره ۶۱۹ وو او سږکال ۳۱زره ۴۲۰ کسانو جذب لرو.»
د کانکور پايلو د اعلان پرمهال د رياست الورزا اداري مرستيال عبدالسلام حنفي وويل، اوس مهال په هېواد کې د زده کړو غوره فرصتونه برابر دي او له ټولو بريالو کسانو يې وغوښتل، چې له هېواد د وتلو تکل دې نه کوي او په کور دننه دې خپلې زده کړې بشپړې کړي.
هغه زیاته کړه:« ځوانانو ته دا توصیه لرو او غوښتنه ترې کوو چې د مخالفینو له لوري دوکه نه شي، د ورنکارو او قاچاقبرو خبره ونه مني، په هېواد کې دننه ان شاءالله د زده کړو زمینه برابره ده، په ټولو پوهنتونونو کې شرایط برابر دي او همدلته خپلو زده کړو ته دوام ورکړئ.»
د کانکور ازمونیو د پایلو اعلان له مخې، د فراه ولايت اوسېدونکی محمود د۳۵۹.۱۶ نمرو په ترلاسه کولو سره لومړى مقام خپل کړى او د کابل طبي پوهنتون د طب پوهنځي ته یې لاره موندلې ده.
د کابل اوسېدونکی عباس د ۳۵۷.۴۷ نمرو په ترلاسه کولو دویم ځای او د کابل اوسېدونکی عبدالباسط د ۳۵۵ نمرو په ترلاسه کولو سره درېیم ځای نیولی دی.
